• July 20th, 2019
Login / Register

Namibia okwa tela Bafana omwiyo okuya koAfcon



Ongwediva - Namibia okwa kala a talika ko onga kashima mongudu yeendjaba koAfrica Cup of Nations. Ashike okwa nukifa mo vahapu eemwenyo eshi a findana, a pa Ghana imwe nomoipakete, hano a findana 1-0 moudano okulipupyaleka wa li ko exuliloshivike.

Naashi osha ulikila ovo va kala ve mu dina kutya oshilongo shomapandafule kashi shi katana.  
Bafana Bafana‚ Morocco naIvory Coast ova li ve wetike va fa ngeno ovo ooshikwetepo noBrave Warriors‚ oi wetike ya fa okafininike, ashike omunduli wayo Ricardo Mannetti okwa ti voo ihava kakama oumbada shapo outalala tau ya. 

Mannetti oo a li nale ha yandje oupyu mospana yoSantos oye umwe womovadeuli a kalela ospana yopashiwana efimbo lile. Mannetti‚ oye a kala ekwetele komesho ospana yokedu lomapendafule oule weedula nhee da ka pita nokwa ya momambo ovadeuli ve likalekelwa ovo hava fiye vahapu tave lipopile  eshi a shingila Namibia kefindano lekopi loCOSAFA mo2015.

Ovadani aveshe ova hupikwa, tava xuwa ongilishi nawa nopaife ova tokola okufiya ookatelekonawa tave lipopile pefimbo tava ka patulula otonamente vo naMorocco.

“Efindano letu eshi twa dana naGhana ole tu pa omukumu neteelelo liwa eshi hatu ka dedaula Morocco notu shi shi kutya otu na okufiya Africa lihe na omate,” Mannetti ta ti.

“Otwa hafela oudano shaashi ondjodi yetu ota i ka twa. Ashike elalakano letu lotete-tete okufindana oudano wetu wotete, nokudja opo ‘eulu keelela’.” 

Ovadani vaNamibia ovo va ninga efiku koDubai tave lilongekidile oudano, ova fika moCairo mEtivali, nomefiku omo, omo Bafana naye a fika. 

“Onhanda oyo twa li twa onga koDubai oyo lela twa li twa pumbwa shaashi oku na oupyu nawa naashi inashi kwafela ashike tu longekide omalutu etu, ashike nomadiladilo yoo‚” Mannetti ta ti.
“Ondi shi shi kutya kape na ou a teelela tu findane, okutala mongudu omo tu li, naashi otashi tu pe onyati opo tu longe noudiinini.”

Namibia oku na ovadani vahapu mospana hava dana molixa yopombada mwa kwatelwa oliga yaSouth Africa omo mu na ovadani ngaashi Deon Hotto woBidVest Wits‚ navavali ovo hava danene oHighlands Park ovo Denzil Haoseb naPeter Shalulile.

Mondjokonona, eshi oshi li oshikando oshititatu, ospana ei tai fiki kedingonoko laxuuninwa lEkopi lOiwana yaAfrica. 

Mo1998, oBrave Warriors oya li ye lihanga kombing ya puka yolukaku lipyu laBenni McCarthy ndele tava wayelwa eekoola adishe nhee. Natango mo2008 koGhana kava li va findana ko nande oudano umwe, ashike ova dana umwe shi fike pamwe ndele tava dengwa mo momaudano avali. 

Mondjokonona ova denga South Africa lumwe, na lumwe ova li va dengwa ko Ivory Cost. Kave na nande efiku limwe va dengele Morocco momaudana aeshe ahamano va shakena momaudano oiwana yaAfrica.


Staff Reporter
2019-06-21 13:11:32 28 days ago

Be the first to post a comment...