• July 20th, 2019
Login / Register

Namibia oshiwana sha handuka ashike


Omutoolinghundana 

ONGWEDIVA - Omidi odo kwa fikama oshiwana shaNamibia oda nghundipala, naashi ota shi ulikwa koimbuluma yokulwa noyokuehamefana komalutu ya londa pombada neenghono.
Edi oda popiwa komufita wongeleka yo Reformed Evangelical Anglican Church of Namibia Lukas Katenda meenghundafana naKundana.
Katenda ta ti oshiwana otashi dulu ashike okupangela omakwatafano nonghalafano pokati komunhu nomunhu ngeenge sha shuna keenghedi dokukondeka oshiwana onga ovadali novatekuli momaumbo, onga ongeleka nepangelo, ashike eshi ota shi ningwa tashi kwatele mo oukwamhepo.
“Shoovene oshidjuu okuulika kutya oshinima shonhumba osho sha eta omalihumbato ovanhu va handuka, ashike eshi sha yela osho sho kutya, odiililo oko kwa fikama oshiwana oyo ya ndjungwaandjungwa, no kaina vali eenghono,” Katenda ta ti.
Ta fatulula kutya outeku wa kwatakanifwa kumwe noukwamhepo oo omidi ile omakanghameno oko ku na okufikama oshiwana.
Ashike paife outeku ou kaupo vali, shaashi ovadali voo vene ina ve li longekida okukala ovadalakadi ile ovatekuli, ehongo lombiibeli meefikola kali mo vali, koo nokongeleka oko nale kwali kuna ofikola yosoondaxa ya fimanekwa noukongindjila inai fimana vali ngaashi sha li nale.
Ta ti oshiwana osha pumbwa okulwifa onghalafano yokahetengi ngaashi naanaa sha kala nokulwifa omashongo makwao a kala a taalela oshiwana oo a kwatela mo ombuto yoHIV.
“Pakulwifa omukifu woHIV ovanhu ova kala have yap o neengudu yambididi omo have li longo nokulitwa omukumo. Natango monghalo ei yopaife ovadali ova pumbwa okuya po neengudu yambididi momikunda, meedoolopa nomomaongalo avo opo veli pe omayele kutya otava tekula ngahelipi ounona vavo,” Katenda ta weda po. 
Oshivike eshi Kundana okwa talela po Omhangulilo yaMangestalata mOshakati, noku tala oibofa oyo ya udika efiku olo komhangu.
Otashi kumwifa nghee omuvalu woibofa youkolokoshi wokuehamekafana komalutu moNamibia unene tuu omahepekafano omomaumbo ya lunda, i dule oibofa oimbuluma aishe ya pwilikinwa mohofa mefiku limwe alike.  
Moipofa 44, oipofa aishe 19 yomuyo yali yehepakafano ile eehameko lomunhu kolutu, mwa kwatelwa nokuli edipao.
Eshi unene tashi limbilike osheshi kutya mokati kovatamanekwa omwa kwatelwa ovakainhun noshikulumuna osho sha talika ko tashi kumwifa shidulife ikwa, omo mo omukainhu a dipaa okamonakadona. 
Kakele koibofa 19 yokuningila omunhu omunyonene kolutu, 12 youmbudi nokulonga noingangamifi na 13 yokuhelifufa keemhango domeendjila.
Mokati koibofa youkolokoshi wokuehamekafana komalutu omwa kwatelwa oibofa yonghendabala yedipao, omo Klemens Angula oo nokuli e na oibofa ivali yoludi olo na Luben Pandeni Mwadhina va holoka momhangu. Omwa kwatelwa yoo oipofa yomadengo kolutu ya mangelwa kumwe nomahepekafano omomaumbo omo ovatamanekwa moibofa yavo kouhandimwe va ovo Rona Kashuupulwa, Matias Amunyela, Taimi Ndapandula Jafelinu na Fanuel Pinias omo keshe umwe a holoka mu shaye. Jafet Eliakim oo naye a holoka molwa eehameko lomunhu kolutu la kwatakanifwa kumwe nehepekafano lomomaumbo, ye okwa wedelwa ko yo sheshundulo lounhu wounhu. 
Kakele koibofa oyo ya kwatafana nomahepekafano omomaumbo, ovakainhu pauhandimwe, Dortea Shikomba, Dortea Tjuura Tobias na Ndapandula Mpingo, navo pauhandimwe, keshe umwe oku na oshibofa yokudenga ovanhu. Eliaser Nauta Shakuyungwa pauyee mwene, nosho yo Calvin Malikiiso Namatama, Simeon Nghidiwakusha Shiwanapo, Johannes Lukas na Jakko Nambili, keshe umwe okwa holoka momhangu molwa eehameko lovanhu komalutu. 
 


Staff Reporter
2019-05-17 11:30:39 2 months ago

Be the first to post a comment...