• November 16th, 2019
Login / Register

NDF a hala aakwashigwana ya hedha kokule nokamba ye



OMUTHIYA-Uuministeli wEgameno otawu ka pula omagumbo gontumba osho wo aanafaalama ye vule 20 ya ze po pomahala mpoka ye na oohambo ndhoka dhi li pomahala gevi lyetanga lyopakwiita pokati kaKing Kauluma nOshivelo. Oshitopolwa shika anuwa osha kwata konyala ookilometa 14. Oshitopolwa shika ohashi longithwa momadheulo gaakwiita. Ngashiingeyi uuministeli otawu ti ihawu vulu we okugwanitha po iilonga mbyoka omolwa aakwashigwana niimuna mboka ya hedha popepi, shoka shi li sha nika oshiponga unene.

Aakalimo mbaka otaya ti oya kala moshitopolwa shika okuza mo1982 manga oshilongo nokuli inaaashi manguluka, ashike oya kumwa okumona epangelo lya hala oku ya tembudha pehala mpoka ya kala konyala oomvula 40. Ngashiingeyi otaya pula ekwatho lyepangelo osho wo Elelo lyaNdonga Lyopamuthigululwakalo. “Shoka tandi vulu okukoleka osho shika kutya ndyoka olya kala ehala lyokwiidheula namanga oshilongo inaashi manguluka. Aantu mbaka oya lombwelwa olundji kombinga yokukala kwawo mpoka shaa li paveta nayakwawo onkene taya tsikile okuya nokuhedha popepi,” osho Lieutenant Colonel Petrus Shilumbu, omupopiliko gwo-NDF ta ti ngaaka.

“Oshikumungu shika osha tameka nale, kashi shi ashike mOshikoto, aantu naya kale ye shi kutya evi ndika olyuumisteli wegameno. Yamwe oye ya unene popepi nokamba naashika osha nika oshiponga. Aakwiita itaya vulu okuninga omadhewo gamwe ngaashi okukookaya nokuumba oondjembo nosha nika oshiponga,” ta gwedha po ngaaka. Ta ti uupyakadhi ohawu tameke aluhe uuna wa etha aakwashigwana ya kale mpoka uule womasiku omashona. 

Molwoshikukuta, oofaalama dho NDF omwa kala tamu iyakelwa nokulithwa iimuna kaakwashigwana moshilongo. Omupresidente Hage Geingob naye okwa li ina popila omaihumbato ga tya ngaaka pethimbo lyoshigongi naakwashigwana mOmuthiya.

Mwene gwomukunda gwOshivelo, Erwin Nashikaku okwa koleke kutya oshitopolwa shoka oshi li metonatelo lyetanga lyegameno.

“Oministeli oya li ya hala okutembudha aantu muSeptemba gwomumvo gwa yi konima sho ya li ya gandja elombwelo ndika pwa pita oomvula ndatu. Onda li nda indile oministeli yi gwedhe ko omvula yimwe manga aantu taya pyakudhuka. Oya kala nokutinda okutembuka nonando ye shi kutya pehala mpoka oye ya po sha enda nomukalo gunipo. Ngashiingeyi kandi na shoka tandi vulu okuninga po,” Nashikaku ta ti ngaaka.
Ta gwedha po kutya aakalimo oya tseyithilwa miigongi mwa kwatelwa naashoka sha li sha ningwa nomukwaniilwa Kauluma Elifas (nakusa) moka ya li ya lombwelwa kutya mpoka oye li po ashike pakathimbo notaya ka za po uuna ethimbo lya thikana.

Amushanga gwElelo lyaNdonga Lyopamuthigululwakalo Joseph Asino okwa ti ka li e shi sha kombinga yoontamanana dhevi ndika, onkene ke na sho ta vulu okutya ko. Ta gwedha ko kutya aakalimo mboka naya fale oshinima shoka kompangu. 


Obrien Simasiku
2019-08-21 07:54:16 2 months ago

Be the first to post a comment...

You might also like...