• February 26th, 2020
Login / Register

NDF ina dheulilwa okukala momapandaanda –Muinjangue,



WINDHOEK-Ongundu yompilameno yedhina National Unity Democracy Organisation (Nudo) oya kumagidha omutse gwoshilongo Hage Geingob kutya aanambelewa yetanga lyegameno inaya dheulilwa okukala momapandaanda taya keelele iimbuluma ihe okugamena ombili yoshilongo.

Ndhika odha popiwa kosheendo shongundu ndjoka shoka sha li sha ka talela po egumbo lyepangelo mOmaandaha gwoshiwike shika, nelalakano lyokuulika elelo lyongundu ndjoka  opo lya hogololwa koshigongi shongundu shokomumvo shoka sha ningwa omvula ndjika.

Omupresidente gwongundu ndjoka Utjiua Muinjangue, ngoka e li omupresidente gwotango omukiintu mongundu ndjoka okwa hokolola kutya yo ongundu yompilameno oya pandula sho omupresidente a tula po ongundu ndjoka tayi ungaunga niimbuluma momapandaanda mOvenduka ihe oya hala etanga lyegameno lyo NDF li kuthwe po momapandaanda.

“Aakwiita out shi shi nawa kutya oya dheulilwa ashike okukala taya gamene oshilongo ihe inaya dheulilwa okukala taya keelele iimbuluma noshowo okukala taya yi moonkundathana naakwashigwana momapaandanda. Onkene inatu tegelela nande ya lundulule omadhilaadhilo gawo ngoka ya dheulilwa momutenya gumwe,” Osho Muinjangaue a hokolola ngaaka omanga osheendo she shoka a enda nasho sha pulakena.

Okwa hokolola kutya oye wete shoopala noshuuka ngele presidente Geingob okwa kutha mo aakwaita momapandaanda e ta tula mo aapolisi yetanga lyamuni gwaVenduka opo ya kwathelathane nopolisi yoshilongo.

“Ngele aapolisi  mboka yopaali ayehe inaya gwana okulwitha iimbuluma omolwashike katu vula okulongitha aagundjuka mboka ye li momapandaanda taya pewa okashona hoka ke li po e taya tsuwa omukumo ya vule oku adha elalakano ndyoka,” osho a totha mo ngaaka sho a gandja omayele komuleli omukwawo.
Ndhika nguka okwe dhi popi shi ikololela koshiningwanima shoka  sha ningwa  omasiku ga piti sho omukwiita gwetanga lyegameno ngoka a li e li komeho pethimbo lyongundu ndjoka tayi patolola iimbuluma a yaha omuhingi gwotaxi sigo okusa molukanda lwedhina Greenwell moKatutura mOvenduka.

Mbaka oya ti nonande itaya popile edhipago ndyoka oye wete kutya aakwiita inaya dheulilwa okulonga naakwashigwana nombedhi onene otayi yi muyo. Ashike Geingob okwa hokolola kutya  oshikonga shoka oshi na okutsikila nonande omuntu ngoka okwa yahwa, ihe ye ita popile edhipago.

 “ Nakuyaha okwa mangwa po, noku li mondholongo oshoka shoka a ninga kasha li paveta. Onkene oshikonga shoka otashi tsikile,” osho a hokolola ngaaka. Okwa popi kutya aakwashigwana oyo yene ya pula kutya aakwiita mboka ye li mookamba naya ze mo ye ye ya lwithe iimbuluma momapandaanda mbyoka yi li ya indjipala , ashike ngashingeyi oyo ishewe taya pula ya kuthwe mo, omanga iimbuluma natango inaya shuna pevi.


Loide Jason
2019-06-21 13:04:16 8 months ago

Be the first to post a comment...

You might also like...