• July 3rd, 2020
Login / Register

Nghaamwa ta zi koshipundi shuungoloneya a kundukidhwa kuuntsa



Ngoloneya ta zi koshipundi sho oshikako she she ya pehulilo Usko Nghaamwa okwa t ota zi koshipundi netumba, ta ti okwa halela ompolo ngoka te ya koshipundi. Omunamimvo 76 oshiwike sha zi ko okwa hulitha po oomvula 15 dhokukala ngoloneya gwoshitopolwa shaHangwena nokwa li a pingenwa po kwaangoka e li omukuluntuwiliki gwElelondoolopa lyEenhana Walde Ndevashiya. “Otwa kaleni nokuuvitha kutya aagundjuka oyo aaleli yokomongula. Ndjika ompito yomugundjuka yokulela,” Nghaamwa ta ti ngaaka moonkundathana noshikundaneki shoNew Era.

Nghaamwa okwa popi kutya pethimbo a kala ngoloneya oshimaliwa shoka sha kala nokupewa oshitopolwa inashi gwana onkene sha kala einda enene okugwanitha po oompumbwe moshitopolwa. Ta popi kutya pethimbo lyelelo lye oya pangela oomboola ndhoka dha li dha teka, oya tunga oongulu dhoosikola osho wo okufala omeya koosikola.

Okwa li wo a kwathele okutunga omuhandjo gwosikola nomoompito dhimwe okwa li ha longitha oonzo dhe dhopaumwene okugwedha po mpoka sha pumbiwa. “Moshitopolwa shetu otwa kala nompumbwe yomeya. Otwa kala noomboola dha teka, shika osha li sha gumu aantu nayi ya kale kaaye na omeya nombelewa yaNgoloneya oya li ya kongo oshimaliwa, nokulanda oosola osho wo okupangela oomboola ndhika opo aantu ya kale ye na omeya gokunwa,” ta ti ngaaka.

Sho ta thigi po ombelewa, Okwa ti oya dhilaadhila okukuna olwishi moshitopolwa shaHangwena. Ngoloneya nguka e hole elongo noku na oyana yoondokotola, okwa kala nokuyambidhidha aalongwa moshitopolwa moka a kala he ya kwathele okumona omakwatho gopashimaliwa ya ka ilongele uundokotola koChina. “Yamwe oya galuka ko ya mana omailongo gawo guundokotola, ta ti ngaaka. 

Nghaamwa okwa li wo a kwatheke metungo lyomuhandjo gwOmungwelume Secondary School, ta ti omuhandjo nguka ogwa pwa okutungwa. Sho a pulwa kutya okwa thinda peni okuza mombelewa, Nghaamwa okwa ti ye omunangeshefa osho wo omunafaalama nota ka tsikila okulongela kumwe naaleli yomoshitopolwa she.
“Sho aantu haya tala ndje oye wete nda kulupa, ashike uuluyi wandje inawu kulupa okuya po nomadhilaadhilo omape,” ta yamukula ngaaka.
 


Selma Ikela
2020-04-14 09:21:07 2 months ago

Be the first to post a comment...