• January 21st, 2019
Login / Register

Nkene Vikta Juiceboy a ningi omuhikingalo



Pinehas Nakaziko

WINDHOEK-Vikta Juiceboy omuhikingalo ngoka e li te shi enditha nawa ngele tashi ya moongalo, unene mokwiimba pamwe naahikingalo ooyakwawo ngaashi Exit, Sunny Boy, okutumbula po ashike yamwepo.


Omwiimbi ngoka a yambukile monooli yoshilongo e na ashike oomvula 20 oku li a tseyika nawa nongalo yedhina Meriam Kaxuxwena, ndjoka oyo ongalo ye ontintatu, noya li ya taambwa ko nawa kaakwashigwana. 


 Omwiimbi nguka e li ishewe omushangingalo, omundaanisi nomuningi gwomikwelengendjo, osho wo omunasikola poshiputudhilo shopombanda shuungomba shaNamibia (NUST) okwa tsakanene noshifokundaneki shika, okupya ondjila ye ndjoka a enda, nankene a ningi omuhikingalo.


Vikta Juiceboy okwa ti ye mehangano lyoongalo okwa li a holokele mo mo2016, pethimbo a li a imbi okangalo ke kotango kedhina Come to me (Ila Kungame), moka a li a kwathelwa okuwiimba kuSunny Boy.


Vikta okwa ti pethimbo lyokupititha ongalo ye ndjoka yotango opo a mone lela kutya oku na oshitalenti, noongalo dhe odha kala noku shi enditha nawa uule wethimbo.


Vikta ngashingeyi oku li a imba pamwe naahikingalo mboka aanene moshilongo, moongalo ndhoka dha kala nokudhanwa shinene noonkondo mpaka naampeyaka.


Kakele kongalo ye ndjoka yedhina Ila Kungame, Vikta oku li ishewe a imba pamwe naExit naNeslow mongalo Atweende. 
Ongalo onkwawo oondjoka yi li moalbuma ompe yaExit, yedhina Omadhina Omanene. 


Vikt,  ngoka ta ti nonando kasha shi oshipu okukala omuhikingalo moshilongo, ye oku li ta pula komeho, nokwa tengenekwa a ka kale a pititha nokuli okavidio kongalo ye yedhina  Meriam Kaxuxwena, oshowo Ken Jou Ma Jy Es Hierso. 


Vikta ngoka e na oongalo dha adha puntano paife, okwa ti ye ota ilongekidhile ishewe oalbuma ye ndjoka tayi ka pita kuyele omvula tayi ya, moka ta ka kala a longa naahikingalo oyendji yomoshilongo.


Vikta okwa ti okukala a shangela aahikingalo oyendji oongalo dhawo, okunyanyudha nokwiimba koradiomuzizimbe yomoshilongo yoNBC, nokunyanyudha piituthi ya yoolokathana mpaka naampeya uule womvula ayihe ndjika otashi ulike nkene e li ta ningi oshitalenti she shi kale sha thika pamuthika gwopombanda.


Okwa ti edhina lyoalbuma ye yotango otayi ka lukwa Bless Up, notayi ka kala oyo yimwe dhingi moongalo ndhoka tadhi ka pita omvula twa taalela.


Pinehas Nakaziko
2018-12-14 15:25:03 1 months ago

Be the first to post a comment...