• October 29th, 2020
Login / Register

NORED a gandja omakwatho gopashimaliwa



Aina Simon

Ehangano lyokuandjakaneka olusheno kiitopolwa yokonooli (NORED) olya gandja ekwatho lyopashimaliwa kaalongwa yatatu ye li momvula yotango kiiputudhilo yopombanda moshilongo yoUNAM noNUST.

Poshituthi shegandjo lyomakwatho ngano sha ningilwa poombelewa oonene dhaNORED mOndangwa moshitopolwa shaShana, Omukuluntuwiliki mehangano lyaNORED Fillemon Nakashole moshipopiwa she shono sha leshwa komupopiliko gwehangano Simon Lukas, okwa hokolola kutya, ehangano olya yakula omayindilo ge li 154 mono mwa hogololwa mboka yatatu shi kwatelela kiizemo yawo yondondo ontimulongo nontiyali, ompumbwe yoshimaliwa, noshowo omikalo dhilwe.

Ehangano olya gandja oshimaliwa sho N$90 000 komulongwa kehe omumvo kehe, notali ka longitha oshimaliwa shomilliona yimwe konima yoomvula ne sho mbaka yatatu taya ka mana omailongo gawo. Mboka ya pewa omakwatho otaa ilongele ookantu dho Degree momalusheno oshowo momayalulo noya shaina etsokumwe nehangano opo konima yeilongo ya ka longele NORED uule woomvula ne.
Nakashole okwa hokolola wo kutya ehangano lyaNORED oshinima shegandjo lyomakwatho gopashimaliwa kaailongi oshimwe sho mefano enene lyomulandu goku pendula po oonzo dhopantu ehangano tali longitha oku kuna maantu nomoshilongo ya kale oshilongitho oshinene melunduluko lya pumbiwa moshigwana nomeliko.

Omukuluntuwiliki okwa gwedhako wo tati NORED okwa shaina omatsokumweuvathano niiputudhilo yopaungomba yomoshilongo yoVTC, noshowo UNAM noNUST opo ya gandje oompito dhomayidheulo kaalonga mboka taa ilongele omaithano ga pamba omayakulo niilonga yaNORED ngaashi omalusheno, oonzo dhopantu noshowo iimaliwa. Okwa tsu omukumo aalongwa mbaka yi ilonge nuudhiginini, ta tumbula kutya “onakuyiwa oyina omauwanawa ogendji oshowo omashongo ogendji nesindano oli li momake geni, longeni nuudhiginini ne mu yande omahongololo”.

Gumwe gwomwaa mboka ya pewa omakwatho Stephanus Nanduwa okwa pandula NORED sho e ya yambidhidha nota tsikile nokuyakwatha, okwa tumbula kutya okwa kala e li mompumbwe yoshimaliwa sheilongo no ta ka longa nuudhiginini.
Aina Simon omunambelewa gomauyelele moshikondo shomauyelele nomakwatathano gopaungomba mOshakati.


Staff Reporter
2020-10-08 10:00:50 21 days ago

Be the first to post a comment...

You might also like...