• December 11th, 2019
Login / Register

Nujoma a hala iigongi yi pangelwe kombili


OSHIKUKU – Omukokolipresidente Sam Nujoma mOlyomakaya okwa li a pula Aanamibia ya ninge iigongi yawo yopapolitika nombili sho kwa taalelwa omahogololo ngoka ge li komkehulilo lyomwedhi nguka. Nujoma okwa li popi ndhika poshigongi shoSwapo mOshikuku, ta ti iigongi nayi kale ekondjithathano lyomadhilaadhilo ashike kashi shi okukonga aatondi.

“Atuheni natu taleni komashongo osho wo koomanifesto dhomahogololo. Uukwatya woshilongio shetu woshili nawu ulikwe pamukalo gwoshikuluntu sho tatu tompathaneni,” Nujoma ta ti ngaaka.
Nujoma okwa li wo a popi kutya oSwapo nayi hangane nokupopya newi limwe opo yi sindane momahogololo twa taalela, ta ti oSwapo oyo ashike ongundu tayi vulu okukandula po omashongo ngoka ga taalelwa kAanamibia.

“Otwa taalela omashongo shili na itaga ka kandulwa po muule wethimbo efupi. Ashike otatu ke ga taalela oshoka peha lyuumbanda otatu hogolola etimaumbwile, elongelokumwe osho wo oonkatu ndhoka tatu ka kutha opo ombepo yoshigwana shetu yi taambidhwe wo koshigwana shokomongula,” osho omukokolipresidente a ti ngaaka.

Okwa li a indile iilyo yongundu tayi pangele yi longe nuudhiginini yi kale nokudheula Aanamibia kombinga yomilandu dhoshilongo nooprogramma opo aantu ya hangane.

Nujoma ta ti ongundu oyi ilongekidha okukandula po omashongo ngaashi ondjala nonkalo yokwaa na iilonga, ta ti oyi ilongekidha wo okuhwepopaleka elongo osho wo epangelo lyi li nawa.

“Kandi na omalimbililo kutya oSwapo otayi ke shi pondola ngaashi naanaa ya pondola okutunga oopate osho wo okutsikila ondjila yeshina lyokolutenda okuza koTsumeb sigo okOshikango, mwa kwatelwa wo netamununo lyetuliloskepa lyaWalvis Bay ndyoka lya ninga etuliloskepa lyaSadc,” Nujoma ta ti ngaaka.

Nonando oshindji sha longwa konima yemanguluko, Nujoma okuwete kutya natango ope na oshindji tashi vulu okulongwa opo omayakulo ga gandjwe kwaayehe. Ta ti natango onkene pe na oombila dhaakwiita yekondjelomanguluko dhaa na omandhindhiliko mboka ya li ya lwile oshilongo pokati ko1960 no1973 moka mu na 25 dhi li moshitopolwa shaMusati.

Amushangandjayi gwoSwapo Sophia Shaningwa naye okwa li wo a popi poshigongi shika nokwa ti Swapo oyi na okusindana ngaashi hayi shi ningi shito.

“Swapo mewiliko lyomundohotola Sam Nujoma oya enda miipyu. Oombulu odha li dha hala okuhanagula po ehangano ndika. OoShipanga oye mu makela, nooMuyongo, ashike oya ndopa. Onkene ookandidate ndhika tadhi ya anuwa odha ithikamena odhi na okundopa. Swapo omusindani,” Shaningwa ta ti ngaaka.
 


Nuusita Ashipala
2019-11-11 08:13:44 1 months ago

Be the first to post a comment...