• August 25th, 2019
Login / Register

Nyanyaleni oukwamuhoko nedengelo lodi peisho - Mushelenga



RUNDU –Minista elile po eyambulepo loilando noitukulwa yokoushai, Peya Mushelenga okwa ti oshiwana nashi li vangeke oukwamuhoko edengelo lodi peisho, paku henuka okuyandja oilonga kovanhu shaashi ashike va dja momuhoko wonhumba ile va pamba ngadi. 

Minista Mushelenga edi okwe di popya mEtitatu, pefimbo a li ta yuulula pambelewa oshivilo shomifyuululwakalo shoUniversiti yaNamibia koshiputudilo shokoRundu. Oshivilo sho shoneudo otashi tyapulwa koshi yoshipalanyolo “Omifyuululwakalo odo omukalo wetu wonghalamwenyo” osha tameka mEtitatu nosha teelelwa shi ye fiyo omOlomakaya. 

Ta ti omalihumbato, nomaliudo ovanhu luhapu okwe li kolelela kongudu yovanhu oyo ye va dingilila.
“Onghee kape na omalimbililo kutya oshivilo eshi shonena otashi yambidida onghendabala yokukoleka oudemokoli, ombili noukumwe. Osho shili meengudu detu nomumidingonoko dado, nashi ulike elongelokumwe, neli longekido okulihonga oinima imwe keengudu dimwe di lili oku tambula ko noku tukulilafana omifyululwakalo diwa.  

“Onghee ohatu kala kokule noukwapata, okulunga-litapula, oko kwa kwatela mo eyandjo loilonga kovanhu vomihoko detu, ile ovakwanedimo letu. Naunene unene ohatu livangeke okatongotongo kopaluvala oko vamwe hava dilaadila kutya ovanhu voluvala lonhumba ove ha eendunge nomadilaadilo mawa edule ovanhu va kwao, nomifyuululwakalo davamwe kadi na ongushu yasha. Etopauko eli nomadilaadilo aa okatongotongo okwa etela oshiwana shetu efyuululo lii, ashike ina li efiwa opo li twikile moNamibia ya manguluka,” Mushelenga ta ti.

“Nomolwaasho vanafikolo, novanashilonga amushe vomoshiputudilo eshi shopombada, handi mu ilikana opo mu longe noudiiinini oku tunga po oukaumwe wa fikama keudafano liwa nokokufimane omifyuululwakalo da yooloka, ashike hakoukwamuhoko ile kelaka. Dimbulukweni kutya ohatu tungeni eumbo laNamibia,” Ta ti ngaho.
 


John Muyamba
2019-08-16 08:37:07 8 days ago

Be the first to post a comment...