• May 31st, 2020
Login / Register

Oembassy yaChina ya gandja omagano goondjato dhi vule po2000


Johanna Aluteni

OUTAPI - Ombelewa yuukaleliposhilongo waChina oya gandja omagano goondjato dhomambo hadhi ithanwa Panda  dhi li 2036  kooskola ntano moshikandjohogololo Outapi moshitopolwa Omusati. 
Egandjo lyomagano ndyoka lya ningilwa poSaara Kuugongelwa Amadhila Resources and Vocational School, olya li lya ningwa kosheendo sha kwatelwa komeho kuambassador gwaChina moNamibia Zhang Yiming, ngoka a li a ende pamwe naanangeshefa Aachina.

Kakele koondjato, mbaka oya gandja wo oshimaliwa shoku ilonga kaanasikola mboka ya itula mo melongo, taya zi koosikola ntano moshitopolwa. Noshimaliwa shoka otashi ka topolelwa aalongwa 30.
Ooskola hetatu dha pewa omagano odha kwatela mo Saara Kuugongelwa Amadhila resources and vocational school, Vision Private Primary, Okahao Primary, Ontoko Combined, Omalago Primary, John Alfonso Pandeni, Onawa Secondary School noPower Station Christian Academy. 

Gavena gwaMusati Erginus Endjala ngoka a tambula ko omagano okwa pandula epangelo lyaChina molwa omagano ngoka.

“Ohashi kala oshidhigu okugwanitha po oompumbwe  dhaanona yetu ngele taya yi koskola, ashike ookuume ketu yAachina aluhe ohaye ya oku tu kwathela, unene tuu sho haye tu pe omagano ngoka taga humitha elongo komeho,” ngoloneya ta ti.

Ta pandula sho oshilongo shoka aluhe hashi tula Namibia momusholondondo gwiinima yalyo ndji yi na oshilonga.

Zhang Yiming okwa ti okwa pandula kuukuume pokati kaNamibia naChina ta ti aanaskola naya ilonge ya itula mo yo ishewe naya kale ye uvite elago sho yavalelwa mevi lyomapendafule.  
 ‘Uundjato mboka owo ookuume keni, u kwate ni nawa, ne u gandje ni kuundenge weni sho ta mu koko,” ambasada ta ti.

Joseph Kashindi omunasikola poVision Private Primary okwa pandula epangelo lyaChina, ta ti Aachiina oya kala ookuume kaNamibia nopethimbo lyekondjelomanguluko.
Ta tsu aalongwa ooyakwao mboka inaa ya mona oondjato omukumo ta ti ina ya sa uunye oshoka oshikando tashi ya oombwa dha kwata odhawo.

 Oshiluku oshitiyali hoshimaliwa sheilongo tashi gandjwa ku ambasada gwa china, osha gandja nale oondjato 46 000 miitopolwa 10 moshilongo. Oondjato ndhoka ohadhi gandjwa kaanona yeli mondondi 0 sigo ontiheyali, niilongo yaAfrican ngaashi, Ethiopia, South Suden, Uganda, naNamibia oyo tayi mono omauwanawa gopoloyeka ndjoka. 


Staff Reporter
2020-03-03 07:57:46 2 months ago

Be the first to post a comment...