• November 14th, 2019
Login / Register

Ohanana ya adhika ya ekelwa mokanaala


Victoria Kaapanda

ONGWEDIVA-Opolisi moshitopolwa shaMusati otayi kongo omukiintu a ekelahi ohanana opo ya valwa mokanaala komeya momukunda Embumba, moshikandjogololo shaShikuku mOmusati.

Inspekta Liinekela Shikongo, gwokoshitayi shokugandja omauyelele mopolisi yaMusati okwa ti oshiningwanima shono osha li sha lopotwa mEtityali potundi 14h30 yomutenya. “Ohanana ndjoka tayi fekelwa kayi na omasiku ga pita pugaali, noya li ya adhike mokanaala komeya momukunda Embumba  komukwashigwana gumwe ngoka a li a ka nwa omeya mokanaala,” Shikongo ta ti ngaaka.

Otaku hokololwa kuya sigo onena kape na ngoka e shi kutya ohanana ndjoka oya li ya umbilwa mo uunake nethimbo peni, kape na ngoka a mangwa kopolisi, nomudhimba ogwa li gwa fala kokila yopilisi kuEtayi molwa egameno, ashike otagu ka falwa  kokila yomidhimba kOkahao hoka tagu ka konaankonwa kutya shoka sha etitha eso oshike.

Omakonaakono gopolisi oge li metifa. Opolisi otayi pula ekwatho moshigwana ngele ope na ngoka e na uyelele wa yina yohanana ndjoka, unene momukunda ngoka oshowo momikunda dhopopepi a kale a lopotela Warrant Ithete konomola 081 2101 1616.


Staff Reporter
2019-09-12 07:56:52 2 months ago

Be the first to post a comment...

You might also like...