• February 22nd, 2019
Login / Register

“Ohole Yandje” otayi landitha ya fa uuleke



WINDHOEK-Miss Rose, okakadhona hoka haka imbi oongalo dhoRnB noAfro Pop kedhina pakuudha Rosalia Shikulo oka tseyitha kutya oalbuma ye ndjoka opo ya li ya piti muDesemba yedhina Ohole Yandje otayi landitha ya fa uuleke.
Kakele kwaashoka, Miss Rose okwa popi ishewe ta ti oku li ta mono omayamukulo omawaanawa kwaamboka ye li taya pulakene oongalo dhe okuziilila kooradio dha yoolokathana dhomoshilongo. 

Miss Rose  okwa ti ishewe oku li a nyanyukilwa oku eta po oalbuma ye ndjika, na ita ka pititha oalbuma onkwawo manga omvula ndjika, oshoka ina endelela ngele tashiya poku pititha oalbuma kehe omvula.

“Nonando oongawo, shika itashi ti otandi kala nda mwena, ashike otandi kala nokunyanyudha mpaka naampeyaka, nokuninga omaulikilo gandje mwene,” Miss Rose ta popi ngaaka.

Omvula ndjika oku li ishewe ta ilongekidha okutseyitha oalbuma ye konyala moshilongo ashihe. Oalbuma yaMiss Rose yedhina Ohole Yandje oyi na oongalo 13, moka a li a longa naahikingalo ooyakwawo ngaashi Tate Buti, Bri, Glo naOnesto.
Okwa ti ye ka li a hala okulonga naahikingalo oyendji moalbuma ye yotango oshoka okwali ahala aaholi yoongalo dhe yamone shoka ta vulu oku etapo oye awike.

Moalbuma muka Miss Rose okwa imba kombinga yohole, eteyo lyomutima nokombinga yonkalamweno ayihe.
Moalbuma ye otamu adhika omaimbilo ngaashi Meme, moka tagandja ombili kumeme gwe nota pula adhiminwepo kiinima ayihe mbyoka aninga.

Moalbuma otamu adhika ishewe eyimbilo Champion, ndyoka tali tungu, notali kunkilile opo aantu yatseye kutya yo oyena oonkondo koomwenyo dhawo dhokumbondolasha nande kaye shishi.

Miss Rose oye ngoka e na ewi lyoshingoli lela, nokuli ha imbi omayimbilo ge moshiwambo, noyendji ohaye mu ngwangwanitha  afa omu imbi ngoka atseyika nawa nongalo Komuthima Gwomeya, Blossom.

Nonando Miss Rose okwali ahala oku pititha oalbuma ye omvula ndjika mesiku lyevalo lye muJanuali 24, okwati ye okwali eyi pititha mbala omolwa aaholi yoongalo dhe mboka ya kala ya tegelela ethimbo, noya kala noku mupula kutya oalbuma otayi piti uunake.

Okwa popi ishewe tati oalbum ndjika eta meko lyiinima iiwanawa, noyendji naya tegelela shoka teke yapa omvula ndjika. Oalbuma otayi landithwa koN$120.


Pinehas Nakaziko
2019-02-01 11:55:12 21 days ago

Be the first to post a comment...