• May 31st, 2020
Login / Register

Okanona kokamati ka hupa momake gwomukwatimbambyona



WINDHOEK- Etanga lyOpolisi moshilongo otali kunkulile oshigwana opo shaa kuthe ko omapopyo gomukiintu keeshiwike ngoka ge li mokawi kokongodhi yopeke taka popi kutya omonamati gwe okonyala a kwatwe po ombambyona  momudhingoloko gwaWindhoek moshiptopolwa sha Khomas.

Shi ikololela kokawi hoka ka tumwa komalungula gwokoongodhi melaka lyoshitakumi oka hokolola kutya omumati gwomimvo hamano okwa za konyala okukwata po ombambyoka komulumentu ngoka a tauka momayendo.

Omukiintu ngoka okwa hokolola kutya oshiningwanima shoka osha holoka  ethimbo lyongula omanga aanona ya li taya yi kosikola, sha holoka molukanda lwedhina Grysblok moka woo mwa li aniwa mwa kwatelwa okanona okakwawo ombambyona omumvo gwa zi ko. Okwa hokolola kutya omunonamati ngoka okwa li a ponokelwa omanga e li nomuniilonga gwomegumbo ta thindikilwa kosikola pethimbo lyongula popepi nomawendo gedhina Oponganda  mEtiyali lyoshiwike shika, komulumentu ke shiwike ngoka a nuka momawendo ngoka. Nakuhokolola okwa ti kutya omukwatimbambyona oye tuu ngoka okwa piyaganekwa ashike kaayendi yokoompadhi mboka ya kala taya fala aanona koosikola naamboka woo taya yi kiilonga.

“Omulumentu ngoka okwa nuka momawendo ee te ya pegumbo lyamumwameme a zala iikutu iinene iiluudhe ta ithana okanona omanga a imanga noshinima oshiluudhe. Okwa tameke ta hili okanona hoka nduno ya kala taye ka kondjele nomuniilonga ngoka a tameke oku kuga sigo ta popilwa. Sho a mono aantu ye ya ye omulumentu ngoka okwa matuka ee ta shuna momayendo moka,” osho omukiintu ngoka a hokolola ta londodha oshigwana shi kale sha tula uunona wawo mootaxi ngele tawu yi kosikola oshoka otawu kwatwa po ombambyona.

Ashike omupopiliko gwopolisi moshilongo Deputy Commissioner Kauna Shikwambi okwa londodha woo oshigwana kutya inashi kutha ko pambambo shoka omukiintu ngoka a hokolola, oshoka ekwatombambyona oliigala ngashingeyi moshilongo. 

Shikwambi momushangwalombo gwiikundaneki okwa hokolola kutya otashi uvitha nayi oshoka kapu na oshipotha sha patululwa moshinima shika oshitalala ihe oshigwana nashi kale shi li ohanda.
“Euvithonayi oondyoka kutya aantu mboka inaya ninga onkambadhala okupatulula oshipotha. Ashike otatu ka ninga onkambadhala opo tu kale twa mona omukiintu nguka e tu pe uuyelele wa gwana opo tse tu kale woo twa londoka,” osho Shikwambi a hokolola ngaaka.

Okwa londodha kutya aakwashigwana naya kale aluhe taya gamene uunona wawo yo woo ya kotokele iimbuluma mbyoka opo tayi tamekwa okulongwa.


Loide Jason
2020-01-23 07:45:52 4 months ago

Be the first to post a comment...