• June 5th, 2020
Login / Register

Okapale kaShakati otaka opalekwa


Victoria Kaapanda

OSHAKATI - Elelo Lyondoolopa yaShakati olyi li metifa okwoopaleka okapale ketanga noshimaliwa shi thike pomiliona N$1.

Okapale kedhina Oshakati Independence Stadium hoka taka opalekwa oshikando oshitiyali ngashiingeyi, otaka opalekwa ashike mokapale ketanga, okutulwa omwiidhi omupe oshoka oshimaliwa inashi gwana okwoopaleka nenge okutungulula okapale akehe.

Omiliyona yimwe ndyoka tayi longitha okapale kokoompadhi oya zi poomiliyona dhi li ine, ndhoka dha li dha longekidhwa kElelo lyondoolopa yaShakati okutunga nokwoopaleka omahala gwomayinyudho oshowo okuhumitha ondoolopa yaShakati komeho.

“Omukwatakanithi gwomawuyelele mombelelwa yElelo lyondoolopa Katarina Kamari okwa ti okulongitha okapale nokutungulula mpoka pwa yonuka mokapale akehe otashi pula oshimaliwa oshindji lela. Okapale hoka oka li ka pula oomiliyona 20 okukatunga po,” Kamari ta ti ngaaka.

Okapale hoka ka kala ke li momake gUuministeli wiilonga niiyenditho, oke li metifa okugandjwa momake gElelo lyondoolopa yaShakati pambelelewa methimbo efupi.  

Kamari ta ti oya kutha ko ngaa manga mpoka taya vulu okulonga oshoka oshimaliwa shoka osho ashike shi li po, ashike natango otaya kongo oshimaliwa sha gwana opo ya opaleke okapale akehe.

Ta gwedha po ta ti nonande okapale oke na nale uupale womawudhano ga yooloka, natango oye na ethaneko lyokugwedha mo okapale kuudhano womokambamba, opo okapale ka gandje  ompito kaaholi yomawudhano ye ka longithe. “Otwa tala natango kukehe ngoka ta vulu oku tu yambidhidha niilongithomwa yokapale nenge okutunga nokwoopaleke, a kale a manguluka okuthika pombelewa yElelo lyondoolpa yaShakati,” Kamari ta popi ngaaka.

Moonkundathana naKundana Kamari okwa ti elalakano lyoku opaleka okapale kokoompadhi manga, omawudhano gekopi lyoshifokundaneki  shaThe Namibian mboka hawu kala ko omvula kehe, tawu ka kala ko muApril nuumvo.

Okapale hoka oka li ka tamekwa okulongwa omvula ya zi ko muSeptemba.
Omunambelewa gwomawudhano moshitopolwa shaShana Thoini Hambeleleni Kasheeta okwa ti okuza esiku okapale ka tamekwa okulongwa  sigo ethimbo ndika, oke li lela  monkalo tayi hokitha nokwa inekela omawudhano ngoka taga ka tameke moomwedhi twa taalela otaga adha okapale ka pwa okulongwa.


Staff Reporter
2020-01-17 08:00:20 4 months ago

Be the first to post a comment...