• November 30th, 2020
Login / Register

Okatomeno kaShakati ka patululwa ishewe



Okatomeno kaShakati kedhina Eloolo oka patulululwa natango, sho ka li ka pata mo 2016.
Okatomeno hoka oka patululwa kepangelo lyaNamibia, opamwe nehangano tali ithanwa KIAT oshowo ehangano lyaChiina lyedhina Ningbo Agriculture Investment.

Oka patululwa pambelelwa kuMinista gUunamapya Carl Herman Gustav Schlettwein mEtine. “Uutomeno owa simana kaanafaalama yiimuna, onkene owu na okuyambulwa po nokuyambidhidhwa wu tsikile okulonga, opo wu vule okugandja  oshimaliwa moshigwana okupitila maalandithi yonyama.” Schlettwein ta ti.

Okatomeno kaShakati otaka gandja iilonga kaaniilonga ye li 80. Omanga 20 yomuyo otaya ka kala haya longo omapitathimbo ashike. Minista okwa ti, epangelo olya kwathele okuyumudha po okatomeno hoka oku ka patulula okupitila mUuministeli wuunamapya, miitopolwa ngaashi Outapi, Eenhana, Katima Mulilo omanga okatomeno kaRundu ke li metifa  okulongwa.

“Okatomeno haka otaka ka eta omalanduluko moshitopolwa, unene kaanafaalama oshowo aalandithi yonyama,” Schlettwein a popi ngaaka.
Ehangano lyaChina olya ti, onyama oya pumbiwa lela moshilingo shawo, onkene otashi kala oshinakugwanithwa shawo, kutya onyama otayi kala tayi tumwa yi ka landithwe koChina. Oya gwedha po taya ti, shika otashi gwedha ko keliko lyoshilongo. Oya kwashipaleke kutya otaya ka longa nuudhiginini, opo ya kwatele po okatomeno hoka kaaka pate we. Ehangano lyoNingbo olya ti, otali ka longela kumwe naanafalama okukokeka omwiidhi gwiimuna.

Mayola gwondoolopa yaShakati Angelius Iyambo okwa ti, aalandithi yiimuna oshowo aanafalama paife oya ningilwa nawa okulanditha iimuna yawo. “Shika otashi yambulitha po wo ondoolopa yetu momukalo gwoku etamo oshimaliwa oshowo okugandja iilonga moshigwana,” Iyambo a popi ngaaka.
Sheetekela Nantinda omulandithi gwiimuna okwa ti, oya kala ethimbo taya longo nuudhigu, oshoka okwa li haya ka konga iimuna kokule oshowo koAngola.

“Okwa li hashi tu longitha nuudhigu, niimuna ohatu yi landa ko himaliwa oshindji. Otwa pandula twa etelwa okatomeno ketu popepi, hoka ke tu konda omagulu okuya kokule,” Ntinda ta ti ngaaka. Titus Shikongo omukalimo gwomomukunda Omuthitu Gwalwani okwa ti, okatomeno ina kapumbwa okukala ka pata, oshoka oke na oshilonga moshigwana.
“Oyendji oya kanitha iimuna yawo omumvo gwa yi ethimbo lyondjala sho ya si po. Ngeno okwa li okatomeno taka longo ethimbo ndyoka, ngeno oka kwathela poompito dhimwe opo ooyene yiimuna ya mone oshimaliwa shontumba,” Shikongo a fatulula. 


Victoria Kaapanda
2020-11-13 08:17:05 16 days ago

Be the first to post a comment...

You might also like...