• November 16th, 2019
Login / Register

Okufikamifa po ongeshefa otashi pula elitulemo- Mwapopi



Lüderitz – Omunangeshefa wopetameko Maano Mwapopi ota tumbula kutya opo omunhu a dule okufikamifa po ongeshefa, otashi pula elitulemo, nomunhu oku na okukala e na ohokwe mwaasho a tokola okulonga ile okulandifa mongeshefa oyo a hala okufikamifa po, opo i dule oku mu etala sha shomondjato. 

“Ino tameka ongeshefa ngeenge ino tokola, nongeengee ino mana mo. Okufikamifa po ongeshefa kasha fi oshinima shidjuu, shoo kasha fi oshinima shipu. Oto dulu okufikamifa po ongeshefa ponhele keshe opo to dulu, ngaashi ame ohandi longele ashike peumbo, novanhu ova shiiva oilonga yange nove i hokwa.” Mwapopi osho a tumbula.

Mwapopi ota taumbula kutya eyakulo nalo oli li oshitwa shopokati. Ta ti omunhu ngeenge oto yakula ovanhu nombili, noku va pa eyakulo li li nawa, eshi nasho otashi dulu okuyambula po ongeshefa yoye.

Mwapopi oku li mwene wongeshefa Mukwanangadu Trading Enterprise CC i li moLüderitz moshitopolwa sha//Kharas. Pefimbo Kundana a talelapo ongeshefa yaye metivali loshivike eshi, Mwapopi okwa tumbula kutya mongeshefa yaye, oyo i li peumbo, molukanda laTutungeni, oha hondjo oikutu yomaludi a yooloka, oha hondjo yoo eembidja dounona dofikola ye oha teleke yoo oikuki yomadalo.

Ota hokolola kutya yee mwene ongeshefa okwe i tameka nale omanga a li omunailonga mofaabulika yeeshi yaNovaNam. Nomodula 2016, omo a tokola okulonga kuyadi mongeshefa yaye, ta hondjele meumbo laye.  
Okwa tumbula kutya, oku na ovanailonga vavali ovo have mu kwafele okuhondja mongeshefa yaye, ashike ovanailonga ovo, oha ve uya ashike okumukwafela ngee va dimbuka koilonga yavo yefiku.
Mwapopi ota tumbula e na ehalo lokudeula nokuyandja ounongo wokuhondja eembidja, shaashi ota ti oye aeke ita dulu okusha kenifa eemhumbwe dovakwashiwana.

Ota tumbula kutya oilonga yokuhondja oikutu okwe i lihongela moLüderitz.  Okuhondja eembindja okwe ke lihongela kofikola yokuhondja eembidja koWindhoek mo2015, ta ka twikilila vali mo2017.
Okulihonga okuteleka okwe lihonga  modula 2014, moLuderitz  no2016 ta ka twikila koWindhoek.
 

Ota tumbula kutya ongeshefa otayi ende ya yuka komesho, nonande etameko ola li li li ngoo . Ota ti ovanhu vahapu kav ali va shiiva kutya oha hondjo nova hovela oku mu shiiva, nopaife ova hokwa oilonga oyo ha longo.
Kombinga yomashongo oo a shakeneka, okwa tumbula kutya omashongo ohaa holoka alushe meengeshefa, ashike sha fimana okupula omayele anghene u na okufinda omashongo oo to shakeneke mongeshefa yoye. 

Mwapopi ota tumbula kutya ongeshefa  yaye yokuhondja, oya enda nawa  momwedi Januali, shaashi ovadali ovo hava lande omidjalo dofikola kwa toka, meefitola ohava hange mo ashike omidjalo dakula doo odile. Ota tumbula kutya, osha kala she va pa oilonga nelipyakidilo muJanuali, okukwata nokuteta, omidjalo opo ovanafikola va wanemo voo va kale va wapala.

Otatu omukumo unene tuu ovanyasha, omanga ve li pehovelo lomudo kutya omunhu ngeenge owe li hange uhe na oilonga, otodulu oku eta po ongeshefa yoye inini, to i eta po nakeshe osho wa dilaadila, no una ounongo musho nelitulemo, otashi dulu ashike oku ku etela sha mondjato noku ku nenepeka ongeshefa yoye.

“Omunhu oho tale omhumbwe oyo i li pomudingonoko woye, nou wete kutya otashi ku etele oshimaliwa, shi ninga nelitulemo. Oshiholellwa ogaashi oku koLüderitz katu na ko  eefitola dihapu, pamwe ou na nande edilaadilo lokukala ho eta eengodi domaludi dokuhondja. Fyee ovahondji hatu uya tu lande koove. Ovanhu vamwe ovo ve li meedolopa ottava dulu oku liunganeka, noku enda va lamabalala omaumbo, okupula ou u na ehalo lokuwapalekelwa eehofa, ngolongo wa shiivika nawa. Fiyo to toto po ongeshefa yoye yokuwapaleka.” Mwapopi ta yelifa.


Tuulikki Abraham
2019-02-01 11:23:57 9 months ago

Be the first to post a comment...

You might also like...