• November 20th, 2018
Login / Register

Olukolo, Onakathila omanyakwa gaShinime ShIivula



Kefas Shipi Elago

Ondangwa - Okapale kaShinime ShIivula mOndangwa Olyomakaya ga za ko oka li ka udha ka fa ofenya sho oohiinina ya za moosikola dhomOndangwa niitopolwa yopuushiinda ya li ya kutha ombinga muudhano wokatanga kokoompadhi nosho wo komokambamba.

Uudhano mboka wa li wa nana konyala oosikola dha konda po 14 ndhoka dha li tadhi ningi shanamutango kesindano opo ku talike ngoka ta yakula po ekopi ndika.

Olukolo Junior Secondary School olwo lwa li lwe ya muudhano mbuka lwi ilongekidha nawa oshoka olwa li talu dhenge aantu taya nuka, noosikola odhindji odha li dha shuna tadhi tsu omazima dho itadhi popile Olukolo omutumba oshoka uumati mbuka owa li tawu dhana okatanga nguukodhi tawu ka lala.

Edhingoloko lyahugunina mokatanga kokoompadhi olya li pokati komukwaniilwa gwomawudhano monooli Gabriel Taapopi noyendji oya li nale ye wete kutya uumati wokOngwediva otawu ka pita po wa fa okambi mehuli, ashike shika inashi ningwa oshoka uumati womOndangwa owa li wu na omulongelo okupa GT.

Nando GT okwa li ta monika e na ontseyo yokwiinyengitha etanga, shika inashi mbandameka uumatyona wokOlukolo mboka wa kala nokukelelitha oombati iikando yontumba uunene tuu medhingoloko lyotango.

Olukolo olwa li lu ulike kutya yo ina ye ya muudhano mbuka osima ashike oye ya okusindana na osho ya li ya ningi sho ya li ya tula GT okoola ya nika oshiponga ndjoka GT a li a nyengwa okulapa ko sigo opokahiya kahugunina.
Olukolo Junior olwa li lwa pondola okudhenga mo GT 1-0 nokuyakula po okapandi kooN$1000, ekopi osho wo oomendalia dhoshingoli.

Gabriel Taapopi okwa li a hakele pehala etiyali nokwa li a fala kegumbo okapandi kooN$800, osho wo oombandi dhoshisiliveli.

Ehala etitatu olya li lya kondjelwa kuHeroes Primary School noNehale Secondary School moka Heroes a li a dhenge mo Nehale nokoola 1-0 moka wo a li i ilikolele okashona kooN$ 600 osho wo oombandi dhoshikushu.
Onakathila Junior Secondary School oya li ya dhenge mo oosikola ndhoka dha li dha kutha ombinga muudhano wokatanga komokambamba, noya li ya yakula po ehala lyotango motonamende ndjika nando oya li ye ya muudhano muka onga osipana kayi na edhina noya li ya mbendekwa okapandi kooN$1000,ekopi osho wo oombandi dhoshingoli. 
Osekundosikla yaNehale oya li ya yakula po ehala etiyali moka ya li ya fala kegumbo okapandi kooN$800, osho wo oombandi dhoshisiliveli.

Pehala etitatu opwa li pwe ya Uukule Secondary School omanga Shinime okwa li e etelele okano pehala etine nolyahugunina.


Shipi Elago
2018-11-09 11:15:11 10 days ago

Be the first to post a comment...