• November 19th, 2019
Login / Register

Omagumbo gamwe momalukanda gomoshilandopangelo ga mona omalusheno


WINDHOEK-Aakalimo yomomalukanda ngoka kaage li pambelewa mOvenduka oye li taya yolele ketayego sho omagumbo gawo gamwepo taga ka pewa omalusheno pambelewa nuumvo omanga omumvo inaagu hula.
Omalukanda ngaka ogo nee Havana nOkahandja Park ngoka ge li miikandjohogololo yili iyali Moses //Garoeb naTobias Hainyeko moKatutura mOvenduka. 

Mbaka oya li ya mono omalusheno ngaka okuzilila kehangano Load Centre ndyoka olyo lya li lyi na oshinakugwanitha shokwaandjaganeke omalusheno mOmaandaha gwoshiwike shika.

Okwa hokololwa kutya  omagumbo ge vulithe peyovi ano ge li 1 300 otaga ka mona omalusheno unene ngaka goombashu.
Shi ikololela kuuyelele wa gandjwa kuminista gwomahumo komeho guushayi noondolopa Peya Mushelenga omilema osho dha hulu momalukanda ngaashi Okahandja Park, Ongulumbashe, Kilimanjaro, Babylon noshowo One Nation.
Mushelenga okwa hokolola kutya  oomalalandithilo ogendji noshowo omagumbo ogendji oga kala nokukondolokwa kodhime onkene shika ngashingeyi osha ninga oshinima shonale.

“Itashi vulika tu kala twa tongola aantu mbaka  nande okuya topolela olusheno. Nayo woo oya pumbwa oku etwa pondondo mpoka pu na yakwawo moshilandopangelo  opo shi kale shayela kutya  omakwathelo getu gwopambelewa oga thika kwaayehe,” osho Mushelenga a hokolola ngaaka.

Okwa ti ye onga omunapolika okwi itayela okwaandjaganitha uuwanawa woshilongo kaantu ayehe shi thike pamwe.
 Okwa ti kutya ehangano ndika lyokwaandjaganitha olusheno lwedhina Load Centre otalu ka andjaganitha olusheno woo koLafrenz Industrial Area opo ku nkondopalekwe iilongadhalwa mbyoka tayi nkondopaleke eliko moshilongo.
 Oshilongadhalwa shika shokwaandjaganeka olusheno nduka osha tameke momumvo 2016 ihe otashi pula elelo lyondoolopa yaVenduka oshimaliwa shi thike poomiliona omilongo 45.

“Shika oshimaliwa sha longithwa nawa.  Notandi pandula oshilandopangelo mwaashoka. Tse onga epangelo otatu gandja omukumo aluhe miinyangadhalwa ya fa mpaka opo omakwatho gwoludhi nduka ga etwe  popepi naantu,” osho a hokolola ngaaka.

Ngoka woo a popi moshilandopangelo pethimbo lyeegululo ndyoka  mayola gwelelolyondoolopa ya Venduka Muesee Kazapua  ngoka a popi kutya ngashingeyi oongeshefa odhindji odhali hadhi pata molwomilema momalukanda ngoka ihe ngashingeyi oyena  oku longa ya manguluka oshoka oya mona olusheno.

 Okwati kutya oshilandopangelo ngashingeyi osha tokola opo shi kale sha gandja olusheno ndoka olundji opo woo aakwashigwana oyendji yomomalukanda ngoka kagena natango uuwanawa owundji ya nyanyukilwe omauwanawa ngoka.


Loide Jason
2018-11-23 11:38:50 11 months ago

Be the first to post a comment...

You might also like...