• August 4th, 2020
Login / Register

Omakonaakono guulunga wiikulya natango oge li metifa


Mayola gwondoolopa yaHelao Nafidi Elias Nghipangelwa okwa hokolola kutya natango omakonaakono moshikumungu shoka shaantu ya yakele po iikulya mbyoka ya nuninwa aakwanaluhepo ya ipaluthe pethimbo lyoshikonga shombuto yoCovid-19 oge li natango mokati na kapu na uuyelele tawu ulike kutya opwa mangwa aantu ya gwedhwa po.
 Oshiwike sha zi ko aanambelewagameni yomaliko yehangano lyaShilimela Security Company nomukwashigwana gumwe oya li ya mangwa nokudhitikwa sho ya yaka iikulya mbyoka.

Nghipangelwa okwa li a hokolola kutya aanambelewa mboka ya inekelwa nawa kelelo okwa li ya kutha iikulya mbyoka ya nuninwa aakwashigwana ye vulithe paantu 4000 ihe ngashiingeyi aantu oyendji otaya ka hupa ko molwiikulya mbyoka ya yakwa.
Okwa hokolola kutya aanambelewa mboka yaali okwa li ya kutu omuntu gwawo ngoka  a li tey a landithile iikulya mbyoka ya yaka.
Ashike aniwa sho elelo lya tameke okutopola iikulya mbyoka olya li lya nothelwa ko kaakwashigwana kutya opu na iikulya ya faathana kwa li tayi landithwa molukanda nayimwe okwa li ya fumvikwa mokapale ketanga.

“Uuyelele mboka owa thiki momakutsi gopolisi ndjoka ya ningi omakonaakono meendelelo sigo tashi ya pemangopo lyaamboka yatatu,” osho Nghipangelwa a hokolola ngaaka.
Okwa li a totha mo kutya iikulya mbyoka ongaashi omakutu guusila wepungu, omakoloni, omalwishi, omagadhi gosolo noshowo oondooha dhoohi.

Oyindji yomiikulya mbyoka okwa li ya gandjwa kaanamutimahenda mboka ye na oshigwana komutima opo ya vule okuhupa pethimbo ndika lyoCovid-19 oshoka aantu oyendji oya kanitha iilonga.
Mayola ngoka okwa li a gandja ombili koshigwana ta ti kutya shoka oshi vule oonkondo dhawo na halyo lya li ehalo lyelelo aakwashigwana yalwe mboka ya shangwa ya hupe ko oshoka iikulya oya li ya gwana.

Mboka yatatu oya holoka mompangu yopombanda mEenhana ashike ayehe oya kalekwa mondholongo mpanga omakonaakono moshiningwanima taga pu.
Nonande opwa li pu na omapyopyo kutya yaali yomaanambelewa melelo oya li ya pulaapulwa moshinima shoka kopolisi onkene ngaa kapuna gumwe a mangwa po natango.


Loide Jason
2020-07-09 09:22:22 25 days ago

Be the first to post a comment...