• May 22nd, 2019
Login / Register

Omakuwa ga ka nale goChief Santos nOshakati City mondambo ehuliloshiwike ndika



Oshakati - Ehuliloshiwike ndika shiti ota ka tekela mbundje pUukwangula pokapale kIita yaKadha sho aadhani aakulu taya ka mwenyeka aaholi yokatanga kokoompadhi ehuliloshiwike ndika.

Ngele omutse ogwu li kumwe nothingo nena aatali yokatanga kokoompadhi oombwa dha kwata odheni, sho aadhani yomadhina omanene monakuziwa yokatanga moNamibia taya ka dhana onkandangala pUukwangula ongula yanakwasha.
Aadhani aakulu  yoChief Santos mboka taya dhana ngashiingeyi kohi yedhina Tsumeb Legends oye li ya kwatelwa komeho kuMohammed Slice Ouseb, Gerros Witbeen, naNelson Geingob.

Pethimbo a li moonkundathana naKundana Rafael Nuumbembe “Chukku” omudhani omukulu gwOshakati City, komeho gwuudhano uunene wehuliloshiwike Chukku okwa li a holola kutya oye li ya unganeka esiku ndika li li li ikalekelwa mondjokonona yomaudhano monooli opo ya nyanyudhe noku eta aantu ya yooloka pamwe okupitila momaudhano.
“Onge aadhani aakulu out uvite kutya otu na oshinakugwanithwa shokukaleka onyeka yomaudhano tayi minikile sigo osigo, noku pa oohiinina oshihololelwa nelongo lya nkene okatanga ke na okudhanwa, onkene otandi indile aaholi yokatanga kokoompadhi opo ye ye ya ondodhe omeho yo ya tseye wo aadhani aakulu mboka pamwe ya kala owala haya uvu nge okatana komiilya,” Chuku ta holola.

Okwa ti kakele koosipana ndhika mbali Northern Legends noTsumeb Legends opu na wo oosipana dhilwe ne ndhoka tadhi ke ya wayimina ngaashi Eleven Masters yaamati ya za pomudhingoloko gwUukwangula nOnangombe tiikanda mboka taya kay a mumwe nOshikuku Masters moka kwa tegelelwa opo oosipana ndhika mbali dhi ka patulule okapale, omanga uudhano uunene wesiku inawu sholokela mokaple pokati koNorthern Legends noTsumeb Legends.

Uudhano wahugunina wesiku otawu kala pokati kOshakati Social Club nOshana Regional Council.
Uudhano waadhani aakulu owu li owo tawu pangele ewangandjo ngashiingeyi miitopolwa yokonooli unene tuu sho ooliha mbali oonshona dhoSecond Division noFirst Division dhi li dha lyata ombiliki.

Onzo ye tu ziilile moosipana ndhika otayi holola wo kutya odhi li moonkambadhala opo dhi tote po oliha nando odhi li wo dha taalelwa keshongo lyoshimaliwa shoka tashi kanda omapunya.
Oondjila adhihe ehuliloshiwike ndika okUukwangula dha thinda oku ka tala nkene omanyakwa omakulu taga undula okatanga.

Okapale kUukwangula oke li mondjila onene ya thinda kOkahao oku za mondoolopa yaShakati konyala uule wookilometa ntano lwaampo.


Shipi Elago
2019-03-01 14:25:03 2 months ago

Be the first to post a comment...