• September 27th, 2020
Login / Register

Omalelo gwopamuthigululwakalo monooli taga ka yambidhidha oshitopolwa shErongo



Elelo lyUukwanyama olya ti oshinakugwanithwa shomuntu kehe okukwathela oshitopolwa shErongo moka mu na oyendji ya kanitha iilonga oshowo iiyemo yawo ya shuna monima omolwomukithi gwoCovid-19.
Omunashipundi gwelelo lyUukwanyama George Nelulu okwa ti edhiladhilo lya etwa puuuyelele kOproyeka Kwafela Oshiwana olyi na ongushu onene, notaya ka kwathela mpoka taya vulu okuyambidhidha.

“Otwa tambula ko notatu ka tula miilonga  edhiladhilo ndyoka mwe ya po nalyo. Ndjika ompito ombwaanawa okulombwela kehe egumbo lyi gandje shoka tali vulu okuyambidhidha nasho okukwathela oshitopolwa shoka,” Nelulu ta ti ngaaka. 
Hadino Hishongwa, mwene gwomukunda Omhedi naye okwa li a pandula edhilaadhilo lya etwa kehangano Kwafela Oshigwana. 
Ta ti omvula ndjika okwa li omuloka omwaanawa ihe kape na ngoka e shi etompelo lyomuloka ngoka. Pamwe elalakano olyokulonga momapya yi ka kwathele mboka ya ningwa oshihakanwa shomukithi gwoCovid-19, ta ti ano oshigwna nashi gandje okashona shi na po. “Nuumvo aanafalama yomomapya oya longa, noya mona iilya ya gwana, onkene kehe gumwe ota indilwa a gandje kehe shoka e na po okuyambidhidha aamwememe ye li koshitopolwa hoka, mboka taya lili mooradio kutya oye li ko taya ya si ondjala,” Hishongwa a popi ngaaka. Ndika okwa li edhiladhilo lyaanafalama yokonooli, mboka ya li ye ya po noproyeka yokugongela iilya, omatanga nomakunde gwondulu okuza kaanafalama aakwawo, yi tuminwe koshitopolwa shErongo.

Omunashipundi gwomalelo gwopamuthigululwakalo monooli Ndilimani Herman Iipumbu okwa ti okwa kala nedhilaadhilo ndika uule wethimbo, nonande a li a adhika koproyeka ndjika a thikama nale, okulombwela omalelo agehe ge shi tule miilonga.
“Shika oshiwanawa, omanga pe na ehangano ndyoka lye shi tula nale miilonga, otatu tsikile ashike okulongela kumwe e tatu yambidhidha oshitopolwa shErongo,” Iipumbu ta ti ngaaka.

Ehangano ndika natango otali indile kehe ngoka ta vulu okuyambidha a kale e shi ninga a manguluka. Olya toto natango ombaanga hoka taku tulwa oshimaliwa nasho tashi ka kwathela oshigwana.
Omupopiliko gwehangano ndika Ben Mulongeni okwa li a kwalishipaleke kutya Omukwanilwa gwaNdonga Fillemon Shuumbwa Nangolo okwa ithana omalenga ge agehe noya li ya kundathana nkene ye na okutula edhilaadhilo ndyoka miilonga noshigwana she.

“Omukwaniilwa Nangolo okwa ti edhiladhilo ewanawa noye na oku li tula miilonga,” Mulongeni ta ti ngaaka.
Mulongeni okwa indile natango kehe ngoka ta vulu okuyambidhidha nehala lyokutula ayihe ya li ya gandjwa koshigwana oshoka pehala mpoka ya li ya pewa olya udha, iigandjwa itayi gwana mo we.  Ta ti ehangano ndika otali kalelele, itali kwathele ashike oshitopolwa shErongo omolwa onkalo ya taa lela, ihe otali kala tali kwathele oshilongo ashihe uuna sha adhika kuupyakadhi. Enenedhiladhilo ndika okwa li lya totwa po kuCornelius Paulus a yambukile mOndangwa.
Paulus okwa pandula kehe ngoka a li a yambidhidha nokukwathela okulongekidha iilya oku ka tsuwa oshowo kehe konga a gandja omakwatho ge.


Victoria Kaapanda
2020-07-16 09:37:35 2 months ago

Be the first to post a comment...