• July 13th, 2020
Login / Register

Omatala omape gaNdangwa oge li pokupatuluka



ONGWEDIVA - Omatala omape ngoka ga tungwa pondingandinga yondoolopa yaNdangwa popepi nomatungo omanene taga ithanwa Onguta oga pwa okutungwa, notaga patuluka momasiku omashona twa taalela,
Omatala ngoka oga tungwa moombinga mbali, nomatala ngoka taga patuluka paife ogokombinga yimwe manga, nombinga ndjoka oya pula oomiliona N$7,5 , omanga ombinga onkwawo ndjoka tayi ka tsikilwa okuza muKotomba yomvula ndjika, natango otayi pula oomilliona N$7,5. Omatala agehe kumwe omape otaga kotha oomilliona N$15.

Omupopiliko gwondoolopa yaNdangwa Petrina Shitalangaho okwa ti elalakano lyokutunga omamtala omape okugandja omahala kaalandithi yomomapandaanda mboka oonkalamwenyo dhawo dha talika ko dhi li moshiponga, oshoka kaye li pomahala ga gamenwa noga yogoka.
“Aalandithi yomomapandaanda oye li monkalo ya nika oshiponga oshoka oyendji otaya landithile kooha dhopate hoka ya tegelela iiponga ethimbo alihe. Momapandaanda kamu na uuyogoki,” Shitalangaho ta ti ngaaka.

Shitalangaho okwa tseyitha kutya omatala ngoka otaga ka ninga omatala omatitatu mOndangwa. Ta ti omu na gamwe ge li kOndjondjo oshowo ko-ABC hoka natango haku kalandithilwa kwaamboka taya zi komikunda, mopaife aashingithi mboka ohaya landitha ashike Omaandaha nEtitano omolwaomahala  inaaga gwanwa momatala.

Omatala ngoka omape otaga ka gandja omahala gokulanditha kaalandithi ya pita po 60. Omahala ngoka otaga ka gandjwa tango kwaamboka ye li momapandaanda oshoka oye li monkalo ondhigu.
“Elelo lyondoolopa olyi na elalakano  okugandja omahala kukehe omulandithi, ashike shoka otashi ningwa uuna pwa monika oshimaliwa sha gwana,”  Shitalangaho a popi ngaaka.

Okwa kumagidha kehe ngoka ta ka mona ehala momatala omape ta ti na tule uuyogoki komeho. “Omahala naga kale ga yela ethimbo alihe, oshowo taya dhiginine omalombwelo oshowo omilandu tadhi ka tulwa po kelelo lyondoolopa.” Selma Nekwaya ngoka ha landitha okapana momapandaanda mOndangwa okwa ti, okwa pandula elelo lyondolopa  kwaashoka lya longo, oshoka oya kala taya mono iihuna ethimbo nuule.
“Osha kala oshidhigu kutse mbaka tu li momapandaanda oshoka ethimbo limwe ohatu kala tu na ookasitoma dha hala okulongitha uundjugo, tadhi pula omeya nenge ehala lyokukuutumba, ihe katu na mpoka tatu ya ukitha,” Nekwaya a popi ngaaka.
Ta ti, otaya pandula natango oshoka omatala oge li mokati kondoolopa moka ookasitoma tadhi kala odhindji nawa.
 


Victoria Kaapanda
2020-06-18 09:12:27 25 days ago

Be the first to post a comment...