• October 25th, 2020
Login / Register

Omathele ga ngundumanene uumbomba okukutha ko N$750



Victoria Kaapanda

ONGWEDIVA-Ongula yEtitano lya zi ko, aantu omathele oya li ya ngundumanene uumbomba wiimaliwa miitopolwa ya yooloka monooli, sho ya tegelela okukutha ko oshimaliwa N$750, shoka shali sha gandjwa kepangelo okukwathelwa mboka ya kanitha ilonga oshowo iiyemo kwa li haya mono omolwa omukuthi gwoCovid-19.
Lovisa Shihepo moonkundathana naKundana okwa ti, imaliwa ye okwa li ya lopota kongodhi ye omutenya gwEtine oshiwike sha zi ko potundi 14h00.
“Inandi tondokela kombaanga Etine ndjoka oshoka okwa li ndi wete andi adha omiikweyo dhina aantu oyendji oshoka esiku okwa li lyotango, nani ngeno okwa li nde ya ohela. Paife onda ninga owiili heyali nda thikama momukweyo inee kwathelwa,” Shihepo a popi ngaaka.
Nonando mboka ya li ya mono iimaliwa yawo esiku ndyoka, okwali ya nyanyukwa, niipala tayi uulike ombili oshowo taya pandula okashona ya mono kepangalo, Kuume Nilenge okwa ti ye ina mona oshimaliwa she, nonando okwa li a ningi omayindilo gwoshimaliwa shoka esiku lyotango.
“Ka ndi uvite ombili nando, oshike aantu yamwe ya mona? Oshike epangelo itali pe aantu ayehe yaninga omayindilo? Naamboka ya ningi omayindilo hugununi kungaye oya mona oshimaliwa shawo. Ka shili mondjila. Ondi na uunona megumbo ihe kandi na sho tandi wu pele mo oshoka kandi na iimaliwa yokulanda iikulya,” Nilenge a popi nongeyo ngaaka.
Eliaser Kalenga, ngoka a li eli momukweyo, ihe ina endela N$750 , okwa li a nyenyeta kutya epangelo olya ninga epuko okupititha oshimaliwa shoka pethimbo limwe, oshoka kehe gumwe okwa hala ashike oshimaliwa, na itaa vulu okutegelela omolwa ondjala yi li momagumbo.
Ta ti aantu oya ngundumana yo oye li mumwe, yo inaya ipititha po omahala shoka tashi vulu oku tandelekitha omukithi gwoCovid-19.


Staff Reporter
2020-04-20 12:31:05 6 months ago

Be the first to post a comment...

You might also like...