• July 8th, 2020
Login / Register

Omatonatelwahala itaga ka gandja we oshimaliwa koomuna- Shifeta



ONANKE-Ominista yomidhingoloko oya  hokolola kutya omulandu ngoka gwa kala po gwokupa aakwashigwana oshipambu shokashana shoka ka gongele po koomuma otashi lundululwa ngashiingeyi noshimaliwa shoka otashi ka longithwa okutota po oopoloyeka ndhoka tadhi humitha komeho aakwashigwana yomomudhingoloko ngoka.

Shifeta ngoka a li ta popi pethimbo lyeegululo lyelongo lyondhalate yoshitopolwa shEtosha mOlyomakaya ga zi ko pomukunda Onanke okwa hokolola kutya aakwashigwana oyendji mboka haya pewa iimaliwa mbyoka ohaya longitha iimaliwa mbyoka okulanda omalovu shoka kashi li mondjila.

Okwa ti ngashiingeyi aakwashigwana oyo yene taya ka totha mo oopoloyeka ndhoka dha pumbwa okulongithwa oshimaliwa shoka, noye wete kutya otadhi vulu oku eta ehumo komeho mokati kawo.
“Onda kundana kutya omu na elongitho lyomalovu lyi li pombanda moshitopolwa muka. Onkene osha yela kutya kehe okashana ka mona omwaalu gu li nawa ohagu topolwa mokati kaakwashigwana, ashike aakwashigwana oyendji ngashiingeyi ohaya yi ashike yuukilila puundingosho,” osho a hokolola ngaaka.

Okwa hokolola kutya omukunda nguka ogu na iimbuluma yi li pombanda mbyoka unene hayi longelwa poondingosho ngele tashi ya pomalugodhi nokwiimonitha iiponga sho taya lu konima yokunwa.
Shifeta ngoka ina holola kutya aantu oya mono oshipambu shi thike peni okwa ti iinima ngashiingeyi otayi shendje opo kehe gumwe a kale a mona ko sha mokashana moka mwa kwatelwa oohiinina mboka taya ke ya, ashike shika otashi vulika ihe ngele opwa totwa oopoloyeka ndhoka woo tadhi vulu okugandja iilonga mokati koshigwana.

Ngashiingeyi moshgilongo omu na uushana wu li 86 mboka wu na iiyamakuti nowu li moshigwana . Wumwe nokuli owa tunga nale oolodge ndhoka tadhi eta po oshimaliwa dho dha gandja iilonga moshigwana.
Oshiholelwa shokashana hoka ke na olodge sha gandjwa kuShifeta ooshoka shUukwaluudhi Conservancy shoka a hokolola kutya olodge ndjoka oyi li ombwanaawa noonkondo notayi eta ehumo komeho.


Loide Jason
2020-02-25 08:31:00 4 months ago

Be the first to post a comment...