• December 7th, 2019
Login / Register

Omaulikilo giipindi gaVenduka inaga enda nawa …Aalandithi oya li taya nyangwa


WINDHOEK- Eliko kaali li nawa moshilongo ngashingeyi olya kwata woo omaulikilo giipindi ngoka haga kala moWindhoek gedhina Windhoek Industrial and Agricultural Show (WIAS) sho aalandi noshowo aauliki yiipindi ya holoka momwaalu omushona lela nuumvo okufaafanitha omimvo dha piti.

Omaulikilo ngaka oge li oshikando oshi-65 nuumvo nosha tamekele momasiku 30 Septemba ee taga hulu mOlyomakaya ya zi ko.

Kakele kaauliki yiipindi mboka ya shuna pevi omaulikilo ngaka unene ganunina uunamapya oga hili oongombe dhi li 300, ngele wa yelekanitha nomumvo gwa yi ngoka gwa li ashike gu na oongombe dhi li 150.
Omupresidente gwomaulikilo giipindi ngoka Vilbard Usiku ta ti nonande oshikukuta osha pita ko noonkondo aanafaalama onkene ngaa ye na oonkondo shoka shi li tashi imonikila nokuli miimuna mbyoka ya etwa komaulikilo giipindi ngaka.

Ashike aalandithi mboka ye li aanangeshefa aashona ngashiingeyi oya hokolola kutya oshi li ekano enene noonkondo oshoka kapu na aalandi oyendji ngaashi oomvula dha piti.

“Oshili muka omuntu owa kanena mo nayi oshoka aalandi aashona lela , ko nako komweelo oku na ondilo aantu okuya mo meni, N$40 odhindji unene kaakuluntu omanga woo N$20 odhindji woo kaanona,” osho gumwe gwomaalandithi ngoka ina hala edhina lye lyi tumbulwe oshoka pamwe ita ka pewa wee oka hala kokulandithila oshikando tashi landula a fatulula ngaaka.

Gumwe woo gwomaalandithi okwa tsikile ko ta ti kutya onkalo yomaulikilo giipindi ndjika inaye yi mona nale oshoka naalandithi oyendji inaye ya ihe natango aalandi otaya shongolola noonkondo adhihe.
Nguka okwa ti kutya ngashingeyi oye na eikwato pomutima enene monakuyiwa , ta ti kutya kayeshi kutya oshikando tashi landula omauliko giipindi ngaka otaga ka kala ngiini.

“Tse muka omo,  olundji twa ikololela okumona okashona ketu hoka hatu hupitha nako oofamili dhetu , ihe ngashingeyi omuntu owa kumwa ngaa nee kutya oto ka hupa ngiini ngele iipindi otayi shongola ngino,” osho omulandithi gumwe gwonyama a hokolola omanga taya yotha onyama ye e na omukumo kutya otaku zi ngaa aalandithi yaali yatatu.


Loide Jason
2019-10-08 07:59:13 1 months ago

Be the first to post a comment...