New Era Newspaper

New Era Epaper
Icon Collap
...
Home / Omikunda adhihe ina dhi ningwa po oondoolopa- NNFU

Omikunda adhihe ina dhi ningwa po oondoolopa- NNFU

2019-08-16  Nuusita Ashipala

Omikunda adhihe ina dhi ningwa po oondoolopa- NNFU

ONGWEDIVA - Jason Emvula gwehangano lyoNamibian National Farmers Union (NNFU) okwa kumagidha epangelo li hulithe po oku lundulula iitopolwa aihe yokuushayi moshilongo noku yi ninga oondoolopa.

Sho a popi noshikundaneki shoNew Era mEtitatu lyoshiwike shika Emvula okwa ti omukalo moka omikunda tadhi lundululilwa moondoolopa moshilonga otagu ulike kutya, monakuyiwa yopopepi, Namibia ita ka kala we e na evi lyuunamapya. 

Omuperesidente nguka gwoNNFU ta ti ye keli ompinge nehumokomeho, ashike nali ende momukalo ngoka tagu vulu oku kwathela oshilongo shi vule oku tsikila nuunamapya nuuteku gwiimuna, okulonga iikulya, noku tidha ondjala moshilongo. 

“Osha yela kutya sho ta tu ka thika pomumvo 2050 omayalulo gaantu muuyuni otaga ka kala geli poobiliona  10, ashike ngele ita tu itula moo ta tu ka kala tu na oluhepo lwiikulya oshoka  evi ndi tu na ngashingeyi ota li ka kuthwa po koomuni,” Emvula ta ti. 

Ta ti okuyambula po iitopolwa yokuushayi nande ina yi lundululilwa moondoolopa oku li oshinima shomwaambyoka tayi ka keelela opo aagundjuka kaa ya kale taya thigi po omikunda dhawo noku mbombolokela kiilando ya ka konge uuhupilo koondoolopa hoka ngashi ngeyi ku na naantu oyendji unene epitilila.  

Omadhilaadhilo gaEmvula oga tsa kumwe nogaagundjuka mboka ya kala uule gwethimbo taya pula epangelo opo li fale ehumokomeho kiikandjohogololo opo kaa ya kale we taya mbombolokele koondoolopa. 
Omunashipundi gwongoga yaagundika ano pRegional Youth Forum mOshana Absalom Itamalo omasiku omashona ga piti okwa li a pula Presidente Hage Geingob pethimbo lyoshigongi shomupresidente shomiinyanga opo pa dhikwe omandiki gokuandjakaneka uuyelele kiikandjohogololo.

Ta ti aagundjuka otaya thigi po omikunda noku ya koondoolopa oshoka momikunda dhawo kamu na uuyelele wa gana nkene ye na okwiihupitha.

Emvula okwa li a pula wo opo epangelo li tule po omilandu dha kwata miiti oku keelela elongitho nayi lyomalovu moshilongo.  

Emvula ta ti, aaNamibia otaya nu nayi omalovu, sho osho to adha aantu taya pula ya pewe oshikukuta nuuna omvula ya loka, shaashi aantu oya tonwa komalovu
“Otwa pumbwa okudhipaga po omukithi gwoku kala tatu ehela, nepanelo olya pumbwa oku ya po nooveta ndhoka tadhi tsu oshigwana omukumo unene tuu aanafaalama opo ya longe iikulya ya gwana,” Emvula ta ti.

 


2019-08-16  Nuusita Ashipala

Tags: Oshana
Share on social media