• August 4th, 2020
Login / Register

Omolwashike ovaAfrika ve li momilaulu, nove li moluhepo nande ve na eedjo dopaushitwe?



Lasarus Hakwaake

Omufita omukulunhu Tatekulu Laban Shitundeni Mwashekele oo a kala nefimbo lile ta udifa evaengeli la yela nola tova moNamibia okwa popya kutya ova Afrika ove li mondjila oyo tai anye okufika fiyo onena nove li moluhepo itali nuwa omeva shaashi otava nyengwa oku lifikamenapo papolitika oshoyo pangeleka. Mongeleka ovanhu ove lihole mwene ponhele yokukala ve hole Kalunga, ova hoolola oku hola omahongo ombilixa oo ta popi oinima ei va hala ponhele yokuhokwa omahongo e na omwenyo noku li mondila notaa kwafa. Osho Mwashekele a ti.

Okwa weda ko ta ti ovaleli vopapolitika ova nwefwamo unene nove li koshi yomilandu dopondje yoshilongo, ve li momake ovanangeshefa , notava kolonyeke nokunyeka oshiwana shaashi ova fa ashike oshixupulo shili meke lomunailonga. “Owa teelela oshiwana shidje moluhepo ngahalipi ngeenge ku na omulandu woye mwene woku ukula eedjo dopaushitwe, nongenge iho fikama ku ove mwene oho fikamekwa owa teelela ngahelipi oku kufa ovanhu moluhepo?” Osho Mwashekele ta pula.

“Afrika okwa pumbwa oku penduka, okwa ti vahapu ovo vokoilongo va ya mekwatafano naNamibia pakupindikafana kave shi ookaume vawa osheshi ohave shi popi ngaashi omambungu moshipa shodi. Enyamukulo koluhepo laNamibia ongenge ongeleka oshoyo epangelo tali fikama noku lifikamenapo kulo vene.” Omufita Laban Shitundeni Mwashekele okwa yandja eeshapi deongalo loMonte Christo Baptist Church olo a yakula eedula 25 ashike okwa dana onghandangala inene mokutota po nokutunga po omaongalo oEvangelical Baptist moshilongo ashishe. Okwa putuda ovafita novakulunhuongalo ovo tava kufako oshilonga osho a kala ta longo oule weedula 35 da pita paife.  Mwashekele okwa yandja oshiholelwa kovakulunhu kutya omunhu okwa pumbwa okulonga, ta putuda, ta deula ndele ta yandje oshilonga kounona navo va twikile ko, oshilonga okwe shi yandja pepupi leedula 59 a fiya ko odula imwe oyo ovanhu hava i mopendjela nokuli. Okwati ota twikile okuya kongeleka ngaashi omukwaneongalo nota ka vatela ashike ngeenge pena omhumbwe.


Staff Reporter
2020-07-03 09:40:13 1 months ago

Be the first to post a comment...