• July 20th, 2019
Login / Register

Omufita Lukas Kaluwapa Katenda a hoololwa Omubishofi woREACH Namibia



Lasarus Hakwaake 

ONDANGWA – Omufita a shivika nawa Lukas Katenda okwa hoololwa moshihongingeleka osho sha li ko onga omubishopa omutivali wongeleka yatungululwa yEvaengeli yaAnglican moNamibia oyo ya shivika nawa REACH Namibia. Lukas Katenda okwa shikula Omubishopa Petrus Tanyengenge Kalangula ou oye omubishopa wongeleka ei ya kala ya shivika nawa nedina Church of England in Namibia (CEN).

Katenda okwa hokolola kutya omudo wa dja ko Ongeleka yaEngland muNamibia ngaashi tai shivika nedina REACH-Namibia monena, oya wanifa omido 40 konima eshi Omutumwa Omufita David Samuel a fikile monooli, monhele oyo ya li ha shivika nedina Owambo, momudo 1977. Samuel okwa li a shakena nOmudiyakoni pefimbo olo Peter Tanyengenge Kalangula, oo a hangwa ta wilike Ongeleka yaAngelikana yeLifikamena mOwambo okudja melinyengo layo lotete mo1969. Konima yoiningwanima aishe oyo, nomouladi waKalangula nomaume aye, okutula kumwe omido omulongo delifikamenopo osho yoo omido 40 moukwashilyo nomeendafano nOngeleka oyo tuu oyo imwe yaEngland muSouth Africa mo1978 ngaashi tai ifanwa monena REACH-South Africa. Ongeleka ei yo REACH-Namibia neudo otai dana omido 50 dekalepo. Nonande ehovelo la li li djuu, omashindo nomayeleko mahapu, ohatu pandula elididimiko linene unene, lovalumenhu novakainhu, ava va kala va dama shili nokukwata onyati okukalela po ondjila ei nonande sha kala sha fa tashi monika ondjila tai hale okuxula osho Katenda a kufilako oshoongalele konima yehoololo laye. 

Okwa popya yo kutya konima ashike yomido mbali ondjokonona onhinhatu melandulafano lOngeleka ei, REACH-Namibia oya hovela vali oku litunga po. Elinyengo li kumwifi ola penduka vali muNamibia eshi ovamati noukadona, va tokola otoko yoovene, pafilonghenda nopaifano laKalunga mwene okuwaimina etanga eli lovaitaveli ovaAngelikana ovo ngaashi edina tali shi holola, ovavaangeli, ovatungululwa ile tu tye ovatungululi, (hano ovanekangha/ovaprotestande), mokukalela po omakanghameno manene atano evaengeli ngaashi taa tofwa mo kutya: “Omunhu oye omulunde nota xupifwa ndele okefilonghenda ALIKE TI, lomuJesus Kristus AEKE TI; kEitavelo ALIKE TI, kEfimano laKalunga AEKE TI ngashi la hololwa mOmishangwa dIyapuki ADIKE TI.” Osho tashi ti kutya keshe shinima tashi ka wedwa ko koinima oyo itano nena osho otashi talwa ko kutya ehongelo lopomunghulo, nolina okukondjifwa lela noku ekelwashi. Eshi osho sha kala sha diininwa kovavaangeli vOngeleka yaEngland pefelemudo eti-16 pefimbo lEtungululo leitavelo olo la hovelwa kuMartin Luther muNdowishi.

Okwa popya kutya oREACH Namibia oi na oshikolo sha kula shokuninga ovanhu ovalongwa va Kristus ndele hailyo yeengeleka, sho osho nee otava ka longa nelipakemo nomikalo dokuvangelifa paumwene, osho tashi ka ningwa kovafita oshoyo ovakwaneongola otava ka ningwa ovalongwa op ova ninge ovaneumbo lavo ovalongwa. Okuevangelifa ovanhu aveshe nopehe na okutala komaukwatya weengeleka davo ngaashi sha ningwa kovaladi veitavelo vooGeorge Whitefield, John Wesley na harles Wesley ovo va udifila omangungo noku va xupifa mo mekano loulunde, noku ilikanena ovanhu momikunda nomikunda. Otava kavaengelifa yoo momaongalo, kutya otapa ka kala omhito yoku eta ovanhu pamwe nokuninga omaudifo nomahongo owina.

Oshinima shinene sha teelelwa oku ninga osho okuninga ovanhu aveshe ovalongwa va Kristus ngaashi pelombwelo letumo. Mokuninga ovanhu ovalongwa omo yoo ovanhu tava dulu oku tofa mo nokuyoolola mo vamwe ovo ve na oipewa neifano lokulonga oshilonga shetumo ngaashi ovafitaongalo novadiyakoni. Okwa divilika yoo kutya ongeleka yoREACH Namibia otai ka deula ovahongi oshoyo ovakwaneongalo nopehe na omaongaongo ngaashi omishangwa tadi ti:

“Ndele osho wa uda kwaame mokati keendombwedi dihapu, shi yandja kovalumenhu ve shi okulineekelwa, va wana oku shi longa vakwao yo.”(2 Timoteus 2:2)”

Onghe okwa indila ovahongingeleka aveshe voREACH Namibia oshoyo omaleloongalo a didilike nawa oipewa mokati kovakwaneongalo, ndele tava pewa emhito dokulamba mo movahongi ngeenge tava pewa eemhito dokuyakula apa naapenya opo ve li hongeleko noku pewa eetundi doku ninga ovanhu  noku va longekidila edeulo lopaufita oshoyo ouyakuliongalo.  


Staff Reporter
2019-07-05 12:08:21 14 days ago

Be the first to post a comment...