• December 8th, 2019
Login / Register

Omukulupe a mangwa po mesiku lyohango ye sho a mitike okamona komimvo 16


Victoria Kaapanda 

ONGWEDIVA-Omulumentu gwomukokele okwa tindilwa ombooloha, konima sho a li a mangwa po sho anuwa a mitike po okamonakadhona koomvula 16. 

Omulumentu ngoka e na oomvula 61, ota pangulilwa oshipotha shekwatokoonkondo noshowo shoku ya miixulo nomukwanezimo lye gwopopepi shoka shi li ompinge noveta yoshilongo.

Sho a holoka lwotango komeho yaMangestalata mOutapi kuyele oshiwike shika mompangulilo, omufekelwa nguka kali a pulwa a ipopile. Otaku hokololwa omulumentu ngoka e na omimvo 61 a mangwa po ongulohi yEtitano lyoshiwike sha zi ko, omanga a li e li moohungi dhohango ye ndjoka ya li yi na okuningwa esiku lya landula ko kongeleka yaKatoolika kOsisia. Anuwa okwa li andola ta hokana po omukiintu gwe ngoka a kala naye ethimbo ele. Ina shi yela ngele omukiintu ngoka oye yina yokanona nenge haye.

Otaku hokololwa kutya omulumentu ngoka aniwa oku na egumbo mondoolopa moka ha zi, negumbo etiyali lyomiti lyi li komukunda Omufituwenghete popepi nOutapi hoka haku zi omwanakadhona. Anuwa komukunda hoka oko nee ha ka tala okanona, e te ka longele iilonga yomilema moluhwa e te ka shuna kegumbo ngele a mana. Okwa kala anuwa ha yi nokamwana miihulo okuza Desemba omvula ya zi ko.
Sho a holoka mompangu petameko lyoshiwike shika, omulumentu nguka a li omuniilonga metanga lyegameno, ihe ngashingeyi okwa penzelwa, ka li a pulwa a tye sha ko sha ketamaneko ndyoka noshipotha she osha li sha undulilwa komasiku ga 7 Novemba nuumvo.

Omugandjimulombo nomugandji gwomawuyelele mopolisi yoshitopolwa shaMusati Inspector Lineekela Shikongo okwa ti omulumentu nguka okwa kala ha yi nomona miihulo okuza omvula ya zi ko. 
 “Inandi yelithilwa natango kutya okanona hoka oka kala ka mwenekwa nashike, ngele okwa kala te ka ningile omatilitho, okwa kala teka futu iimaliwa nenge oke halako lyako,” Shikongo ta ti ngaaka.
Sha ikolelela koshifokundaneki shoConfidente, okanona hoka ke li mongundu ontiheyali, oka li ka gandja ehokololo tango kaalongi yako koskola kutya he oha kondjitha okuya nako momilalo.

Omulongisikola ngoka okwa li e shi lopota kopolisi osho wo kaakuluntu megumbo noku ya kumagidha ya fale omunona koshipangelo. Sho okanona ka pulwa anuwa oka hokolola shoka ka kala taka ningilwa kuhe, ashike ka ka li ke shishi ngele oke na epunda. Sho yinakulu e ka tala okwe ka dhimbulula mbala. Oye ka fala wo koshipangelo ngaashi ya lombwelwa komulongi, hoka kwa ka kolekwa kutya oke na shili epunda.
Okwa hokololwa aniwa okanona ka kala haka pewa uumaliwa mpaka naampeya ka, omathimbo gamwe N$50, unene ngele kosikola ku na omawudhano. 


 

  


Staff Reporter
2019-10-04 09:05:29 2 months ago

Be the first to post a comment...