• January 21st, 2019
Login / Register

Omumvo 2018 nomaudhano



■  Kefas Shipi Elago

Ongwediva - Sho omumvo gwo 2018 gu li pokudhilongela Etitano ndika otatu mu etele oshinyanyangidhwa shahugunina shomumvo , epandja lyomawudhano olya tula kumwe oonkundana dhomawudhano ndhoka dha kala nokunyuwitha omakutsi momukokomoko gwomvula.


Omumvo 2018 ogwa li gu udha oonkundana dhomawudhano, dhimwe otadhi hokitha dhimwe odha li dha dhenge yamwe pomitima.

Okatanga kokoompadhi:Osipana yokatanga kokoompadhi yopashigwana oya li ya mono omasindano ga simana molweedno lwokukondjela ehala muudhano wekopi lyiigwana yaAfrica ndyoka tali ka kala ko omumvo tuuka,.


Namibia okwa li a dhenge osipana yaMozambique pondje nomeni lyegumbo nomasindano ngaka oga li ga eta opo Namibia a kale kuunyogo woku ya kekopi lyiigwana yaAfrica omumvo tu uka.

Omumvo gwo2018 inagu endela nawa aayambidhidhi yoosipana dhoChiefs moNamibia, sho Young Chiefs, Rundu Chiefs, noChief Santos dha li dha pewa mo okangola moliha onene yaNamibia Premier League kuyele nuumvo molwa okudhana nuundende kwadho.

NFA: Ehangano lyokatanga kokoompadhi oli li monkugo yi na onkambe konima sho omitse dhehangano ndika, Frans Mbidi naBarry Rukoro ye li yi inimpila iikaha noye li taya ipe omalukaku omutenya nuusiku kehe gumwe okwa hala mukwawo a thiga po ehangano ndika , noshikumungu shaNFA oshi li miikaha yaFIFA ngoka a tokola okutuma osheendo oshinene koNamibia opo shiye shi kuthe omasipa pokati koombwa.

Ekopi lyuuyuni:Omumvo gwo 2018 omwa li wo mwa dhanwa uudhano wokatanga kokoompadhi wekopi lyuuyuni moka France a li a wayuka mo onga enyakwa lyuuyuni mokatanga kokoompadhi konima sho a li a dhenge mo Coroatia 4-1 medhingoloko lyahugunina

Ateletika: Ethigathano lyOld Mutual Vitory Race olyo limwe lya kala nokudhana onkandangala mepandja lyomawudhano moka lwahugunina Helaria Johannes naReinhold Thomas ya li ya pondola yakwawo oontanga methigathano nokuninga omanyakwa go2018.

Netball: Osipana yokatanga komokambamba yopashigwana yaNamibia oya li ya pewa nambwa kiilongo iikwawo mekopi lyoDiomond Challege ndyoka lya li moSouth Africa noya li ya zi ko ompadhi ketako oshoka oya li ya dhengwa shinyanyalitha na inayi sindana nando uudhano wumwe. 

English Premier League: Manchester United okwa li a hulitha po okondalaka yakana kule Jose Mourinho ngoka e li omvalele yaPortugal konima yedhengo lyinyanyalitha kosipana yoLiverpool, Mourinho okwa li a lombwelwa opo a pakele iinguma ye nokuthiga po osipana yoManchester moontundumene dhEtiyali twa zi.

Mbika oya li yimwe yomiinenenima yomawudhano yo 2018 otwi inekela omwakala mwa landula epandja lyomawudhano muKundana, tsikileni no ku shininga momumvo tuuka epandja lyomawudhano olyemuhalela Okrismesa yayambekwa nomumvo omupe gu na ompolo.


Staff Reporter
2018-12-21 09:12:00 1 months ago

Be the first to post a comment...