• September 22nd, 2020
Login / Register

Omunyekadhi nale gwaNdonga ota pangulilwa ekwatombambyona


ONGWEDIVA - Ompangulilo yaMangestalata mOndangwa oya undulile komeho oshipotha moka ngoka a li omunyekadhi gwOndonga nayakwawo yatatu taya pangulilwa iipotha itatu mwa kwatelwa shekwato po mbambyona. 

Secilia Elifas ngoka a li a hokanwa kunakusa omukwaniilwa gwOndonga Kauluma Elifas opamwe nayakwao –gumwe okwa li elenga lyomukwaniilwa, Johannes Amupanda Sakaria ngoka a tsyika nedhina Nepando, nosho wo Johannes Kateta otaya pangulilwa iimbuluma mbyoka anuwa ya li ya ningi momumvo 2018. 

Oombapila dhompangulilo otadhi ulike kutya kuku Elifas oye omutamanekwa gwotango, omanga Sakaria omutamanekwa omutiyali, naKateta oye omutamanekwa omutitatu. 

Nonando kapu na naanaa uuyelele wa gwana, mbaka anuwa oya li ya kwata po ombambyona omulumentu nguka a li omuniilonga kohambo yuuwa, e taye ke mu ningila omahepeko gopalutu nosho wo omambandameko. 
Sho ya holoka komeho gomupeha Mangestala Cornelius Haipumbu, omukalelipo gwayo gwopaveta okwa pula opo oshipotha shawo shi undulilwe komeho nuule womvula ayihe. Mangestalata okwa zimine opo ya kale kondje, ashike okwe ya pe ya kale meni lyekunkililo, sigo esiku lyiihokolola ndyoka tali ka kala ko okuza momasiku 31 Mei 2021 sigo omasiku 04 Juni 2021.  
Chaly Iyambo oye a li a kalele po epangelo moshipotha shoka. 


Staff Reporter
2020-05-12 09:14:33 4 months ago

Be the first to post a comment...