• March 28th, 2020
Login / Register

Omupolisi ngoka a li ta kambadhala okulanditha po epeko a tindilwa ombooloha


GROOTFONTEIN - Omupolisi omunamimvo 32 ngoka ta tamanekelwa oshipotha shonkambadhala yokuyaka po epeko lyoshipotha komukayulinyanga kooN$ 2 500 okwa li li a holoka mompangu yaMangestalata yaGrootfontein mEtine. Detective Sergeant Salomo Tsuseb okwa li a holoka komeho gaMangestalata Stanley Tembwe. Tembwe okwa li a fatululile Tsuseb uuthemba we wopaveta a konge omukalelipo gwopaveta gwopaumwene, nenge a ninge eindilo a pewe ohahende yepangelo okupitila moshikondo shoLegal Aid muuministeli wuuyuki, nenge a ikalele po yemwene mompangu.

Omupanguli gwepangelo Esther Sylvanus okwa li e li ompinge negandjo lyombooloha, ta ti Tsuseb otashi vulika a ka ye omakonaakono gopolisi moshipala. Sylavanus ta ti itashi kala muuwanawa wokulonga nuuyuuki ngele nakufekelwa okwa pewa ombooloha oshoka okwa taalela oshipotha oshinene.
Oshipotha osha li shu undulilwa komasiku 21 Apiilili opo ku monike ompito ya gwana yokukonga omakonaakono naTsuseb a konge ohahende. Omupopiliko gwopolisi moshitopolwa shaTjozondjupa, Inspector Maureen Mbeha mEtine okwa li a lombwele Nampa kutya Tsuseb okwa li a mangwa po lwopotundi 12h00 mEtitatu sho a li ta kambadhala okulanditha po okadoketa CR 31/02/2016.

Ta ti epeko ndika olyi na sha noshipotha shokuhinga nuuhasha moka mu na uuyelele kombinga yokanona hoka ka li ka lyatwa kohauto moGrootfontein mo2016.

Omufekelwa okwa li a mangelwa pehala lyokunwetha omahooli moGrootfontein moshikonga sha li sha ningwa kopolisi osho wo aanambelea yokakominsi ke li ompinge nuulingilingi. N$2 500 ndjoka ya li anuwa oyo tayi futwa oya adhika naTsuseb.
– Nampa


Staff Reporter
2020-03-09 07:44:30 19 days ago

Be the first to post a comment...