• May 26th, 2020
Login / Register

Omupresidente okwa ti ina hala oominista dhaananyalo



Omupresidente Hage Geingob okwa londodha oominista pamwe  naapeha yawo ya kale ya ilongekidhila okukwatha oshigwana oshoka okwa hala epangelo tali longo nokugwanitha po oompumbwe dhaakwashigwana mboka ya tula eyinekelo muyo.
Okwa hokolola kutya ye itaka idhidhimikila nando oominista oonyenge nenge ihadhi longo dhi itula mo oshoka hasho e ya ulikila.  

Geingob okwa ti mboka ya kala miilonga noya shunwa mo naya tsikile nokulonga nuudhiginini ashike mboka aapeepeka naya longe nuudhiginini opo kaye mu shunithe monima.

Omatumbulo ngoka omutse gwoshilongo okwe ga popi ongula yohela kegumbo lyepangelo pethimbo lyeganithilo miilonga lyoominista noshowo aapeha minista mboka aape noshowo aakulu.
Mboka oya ganithwa okuya miilonga yawo okutameka mOmaaandaha goshiwike shika, oshoka mboka ya li mepangelo ekulu oya hulitha po iilonga yawo mOlyomakaya ga zi ko, sho oshikako shawo sha thiki pehulilo .
Omupresidente okwa li a ganithilwa miilonga oshikako shika mOlyomakaya ga zi ko sho oshikako she sha thiki pehulilo momasiku 21 Maalitsa , noshi li omukalondjigilile oku ulika mboka a hala kulonga nayo papangelo naamboka a hala okukutha mo uuna inaya longa nawa pethimbo ndyoka a li ta longo nayo.

“Onde mu pa iilonga mbyoka oshoka onde mu inekela okulonga nane notamu vulu okuyamukula komaindilo noshowo omanyenyeto gaakwashigwana, ashike ngele inamu longa nawa ondi na uuthemba woku mu kutha miilonga moka, oshoka onda hala epangelo tali longo nuudhiginini naantu taya yamukulwa pethimbo,” osho Geingob a hokolola ngaaka sho a popitha aaleli aape naakulu lwotango.

Ngashiingeyi Geingob okwa ningi ondjokonona sho a ulike omugundjuka gwomimvo 23 Emma Theofelus onga omupeviminista gwomauyelele nomakwatathano gwopaungomba. Theofelus oku li gumwe gwomaaulikwa yowina yomupresidente ngoka ta kala oshilyo shomutumba gwopashigwana noshowo shokabinete. Nguka okwa ningi ondjokonona oshoka oye gwotangotango ta kala omupeviminista mondjokonona yaNamibia e na oomvula ndhoka a landula ompilima gwoshilongo ngoka a li a ulikwa oshilyo shopaliamente omanga e na oomvula 27 mepangelo lyongundu tayi pangele Swapo.

“Aantu naya lelwe ee taya yamukulwa ngaashi pepulo nopoompumbwe dhawo ndhoka taya pula. Ngele inamu longa e tandi mu tidha inamu huga ndje,” osho a hokolola.


Loide Jason
2020-03-24 09:16:38 2 months ago

Be the first to post a comment...