• September 23rd, 2020
Login / Register

Omuyalu gwaantu ye na omukithi gwoCovid-19 gwashuna pevi mOhangwena



OSHITOPOLWA SHAHangwena oshi na aantu yeli 13 yali ya monika omukithi ngoka gwoCovid-19, moka yeli 11 ya aluka nawa noya lalekwa. Omu na owala aantu yaali natango taya  ehama.
Okuza esiku lyotango omukithi ngoka gwa ponokele oshitopolwa shaHangwena, aantu ashike 384 ya ikalekelwa omanga yeli 372 ya lalekwa. Ngaashingeyi aantu yeli 12 oya ikalekelwa.

Omukuluntu gwoshikando shuundjolowele moshitopolwa shaHangwena John Hango, okwa yelitha ta ti, omwaalu gwaantu ya kala nawa otagu shuna pevi unene omolwa omasiku goku ikalekela aantu ga shunwa pevi, ga ningwa ga heyali.“Sha ikolelela pamulandu ngoka omupe gwa pitithwa, omuntu ngele okwa gwanitha omasiku gaheyali a ikalekelwa sho a monika omukithi ngoka, omukithi ngoka ka guna we oonkondo okutaandela. Ota lalekwa eta ka ikaleka yemwene kegumbo,”Hango ta ti ngaaka.

Ta kumagidha kehe ngoka itaa landula omilandu nomalandulathano okukeelela omukithi gwoCovid-19 yega tule miilonga nokugasimaneka.
“Shika otashi ningwa unene kaanyasha, mboka inaa ya hala okuzala uumasika uuna yeli mokati kaantu. Otandi pandula kehe gumwe ta gwanitha po omalombwelo ngoka. Naya tsikile nasho, sho nashikale oshiholelwa sha kehe gumwe,”Hango ta kumagidha. Hango ta ti, nonando yamwe moshitopolwa shaHangwena otaya iyutha komalombwelo, natango ope na mboka taya ngundumana pomahala gomaninwo omanga taku ti, naya lande shoka yahala etaya kanwina komagumbo.

Mokati kaantu yangundumana otamu vulu okukala gumwe e na omikuthi ngoka, etagu taandele oshitopolwa ashihe, onkene otaya kumagidhwa kaaya ngundumane pehala limwe.
“Otandi pandula oshigwana sho tashi longele kumwe nUuministeli wuundjolowele sho tashi lopota aluhe, ngele pe na gumwe a iyakela mokati kaantu omanga inaa konaakonwa nenge ina ikalekelwa ngele a za komahala ge na iipotha yili pombanda,” Hango  ta ti ngaaka.
Ta ti, oshigwana nashi tsikile nokushininga, opo shi keelele omukithi ngoka kaagu taandelele.Ta gwedha po ta ti, oya ilongekidha ethimbo alihe, okuthika mpoka ta pu lopotwa omawupyakadhi goludhi ndoka, nokugandja omakwatho agehe ga pumbiwa.


Victoria Kaapanda
2020-08-12 10:28:52 1 months ago

Be the first to post a comment...