• May 25th, 2020
Login / Register

Omweelo omunene gwopOshivelo itagu pata 



Victoria Kaapanda

ONGWEDIVA – Sha landula elombwelo lyomupresidente Hage Goingob kutya oongamba  dhokuya miitopolwa Khomas nErongo itadhi ka pitwa okuza ngula, ano itaamu ziwa mo itamu yiwa, omweelo omunene okuza konooli inagu kwatelwa mo. Omupopiliko nomugandjimulombo gwopolisi moshitopolwa shaShikoto Inspekta Ellen Nehale okwa koleke kutya Oshivelo itashi pata manga oshoka inashi kwatelwamo momusholondondo goongamba ndhoka kwa tiwa nadhi pate.

“Katu na natango edhilaadhilo lyokupata omweelo gwaShivelo, nongele otwa lombwelwa tu gu pate, oshigwana otatu shi tseyithile meendelelo,” Nehale a popi ngaaka.
Shika okwe shi pititha okutseyithila mboka ya li ya longekidha okuya nenge okushuna komalukalwa gawo omanga Etitano inai thika omolwa uutile kutya otaya patelwa kondje nenge meni lyOshivelo.
Omatokolo ngoka okwa li ga ningwa konima yomukithi Covid-19 ngoka tagu taandele esiku kehe nomwaalu gwa uka pombanda, gwa kwata ngashiingeyi aantu ya thika puyaheyali, mwa kwatelwa Aanambia ye li yaali.
Nonande oyendji ya kala inaya itaala kutya omukithi ngoka itagu kwata aaluudhe, uuministeli wuuhaku nonkalonawa okwa li we shi koleke nokuwashilipaleka kutya omukithi ngoka ogwoshili nogwa nika oshiponga.

Okwa li wo a kumagidha aakwashigwana ya iyuthe koompango adhihe oshowo ya landule omalombwelo agehe okukeelela omukithi goCovid-19.
Aantu naya iyoge koonyala ethimbo kehe, naya ikaleke kokule nomahala ga udha unene. Kehe ngoka ta ka iyadha a fa e na omadhidhiliko ga fa ngoka taga ulike omukithi gocorona, ina kambadhale a ye koshipangelo ye mwene ihe na dhenge konomola  yoshali 0800100100. 


Staff Reporter
2020-03-26 09:26:31 1 months ago

Be the first to post a comment...