• September 30th, 2020
Login / Register

‘Onda li nde mu tala ko onga okanona kandje’ – Negumbo….Rebekka Nunu Elifas ota lilwa koyendji



Omukuluntu gwaKati FM mOshakati Suoma Negumbo okwa ndjokonona Rebekka Kanunu Elifas “onga ependa esindani, omunankondo nomutoolinkunda omwiidhidhimiki nomunyanyukwi.

Elifas ngoka a yambukile momukunda Iihanguti-Elim moshitopolwa shaMusati nokwa hulitha uusiku wEtine mOshipangelo shaKatutura moWindhoek, moka a li a kala mo owili yimwe ashike. Okwa adhika opo owala a tuminwa ko koshipangelo hoka okuza koshipangelo shopawumwene, Lady Pohamba.  Okwa li e na omimvo 34.

“Onda li nde mu tala ko onga ndi li nokanona kandje. Otwa kanitha omuniilonga omuyuuki, ha gwanitha po iilonga ye ngaaashi yi na okukala. Elifas okwa li ha wilike ooprograma yuundjolowele noyuunona oshowo yiiningwanima yopethimbo,” Negumbo a popi ngaaka.
Elifas okwa li e na ontseyo yokukundaneka yoomvula 11. Okwa tameke eithano lye lyuutoolinkundana sho a li iidhewula tango moNBC mOshakati mo2011, nomolwa ontseyo ye nomikalo itoo dhi pewa, Elifa okwa li  a kuthwa po.

Omukwanezimo lye gwe Ndaambe Ashipala ota ti, Elifas okwa kala e li moombete ethimbo lyuule woomwedhi mbali nomasiku.
“Omumwameme inaya moshipangelo nuuwehame wokumufala sigo omeso, Elifas okwa yi koshipangelo sho a li i iyuvite kashona, ashike oondohotola odha tokola oku mu tanda,”Ashipala ta popi neyeme.

Ta hokolola ta ti, sho a li a taambelwa moshipangelo shopawumwene mOngwediva Medi Park, okwa li ye mu tanda tango mepunda moka a li ta ti okuvite tamu ehama.
Konima yomwedhi gumwe, okwa taambelwa moshipangelo shopawumwene, Lady Pohamba hoka natango a ka tandwa olutiyali, oshoka aniwa etando lyotango kalya li mondjila.

Ashipala ta ti, okwa kala ta mono epango ewanawa moshipangelo moka nonande ya kahulila muunyengwi. Aniwa okwa li a ningi ethimbo sho a li a tandwa tango, nuuwehame mboka owe mu fala sigo omeso.
“Ondi uvite nda kanitha ombinga yandje yimwe, namwenyomwaanawa gwandje a thigindje po. Kanunu omukadhona gwomwenyo omwaanawa itandi dhimbulukwa uuwinayi we, shapo onge ta yolo , ye ta ithithana ndje ta ti, Enkene,”Ashipala ta ti ngaaka.
Ashipala ta ti, uuyelele wefumbiko otaye wu pitha  okuza nena, oshoka oya ndhindhilike kutya mehuliloshiwike ohamu kala iituthi oyindji, oshihwepo ngele tali ningwa mokati koshiwike.
Kuume ke kopothingo, Paulina Ndangi Kadhikwa okwa ti, okwa kanitha kuume ke, ngoka a ningi mumwayina muule wethimbo yakala naye okuza kuunona.

“Kandi na iitya nomatumbolo. Olye ta fala ndje we kuuyenda, omupeha gwandje, onkelo yaLoini yaKambwa ya thiga ndje pomutenya. Nduungila momikala dhandja Kalunga nkelo, natse omelila ngaa tu li, vululukwa nombili kamwameme,” Kadhikwa ta popi ngaaka, nomahodhi taga tondoka.   Kakele kokulonga onga omutoolinkundana, Elifas  ngaashi a li a tseyika nawa mokati koshigwana, okwa li wo oshilyo shoshinyangadhalwa hashi kalako omvula kehe, shoka hashi hili oyendji okuza koombinga noombinga ethimbo lyokili, tashi ithanwa “Elim Dubai”
Elifas okwa thigi ko okanona ke kokamati kamwe, yina nomumwayinakadhona gumwe.


Victoria Kaapanda
2020-08-11 15:21:45 1 months ago

Be the first to post a comment...

You might also like...