• May 25th, 2020
Login / Register

Ondjamba yokefuta tayi kala pomulonga gwaSwakop mpanga  tayi loto


Uuministeli gwomidhingoloko noshowo omatalelopo owa hokolola kutya ondjamba ndjoka ya li tayi nyanga iiwike iyali ya piti komulonga gwaSwakop ngashiingeyi oya galuka ishewe komukunkulo gwefuta lya Mbaye.
Shika osha li sha kwashilipalekwa komugandjimulombo omukuluntu muuministeli mboka Romeo Muyunda. Muyunda nokwa hokolola kutya ondjamba ndjoka ngashingeyi oyi li momulonga gwaSwakop popepi noRossmund.

Ta ti kutya uuministeli owa tokola opo ondjamba ndjoka yi kale ashike pehala mpoka oshoka opu na uulithilo noshowo omeya omanga ta pu ningwa omalongekidho ge li nawa oku yi shunitha ko.

“Mpoka opu na uunapelo guyi li nawa noshowo omeya ga gwana nawa okunwa. Nayi kale mpoka oshoka pamwe otayi kala nawa mpoka,” osho Muyunda a hokolola ngaaka, ta lombwele aatoolinkundana ongula yOmaandaha goshiwike shika.  Muyunda  okwa ti kutya uumunisteli ngashingeyi otawu indile aakwashigwana ya kale kokule nehala ndyoka, opo ondjamba ndjoka yi ngungumane yo yaa geyithe ondjamba yi ete evundakano pokati kaantu nayo. Okwa ti kutya ondjamba ndjoka oyi na ombili sigo ongashiingeyi  nelalakano lyuuministeli noshowo aanambelewa mboka taya ungaunga niinamwenyo ya gamenwa oku sa oshimpwiyu kutya oya thika kegumbo ano kokashana hoka ya li ya zile.

 “Ondjamba ndjoka otatu kala tatu yi litha notatu ka kutha ashike etokolo ngele onkalo otayi thiminike,” osho Muyunda a hokolola ngaaka momulombo omufupi ngoka a tumine kaatoolinkundana.


Loide Jason
2020-02-12 07:40:13 3 months ago

Be the first to post a comment...