• September 20th, 2020
Login / Register

Onkalo yoluhepo tayi thiminike Aahimba ya landithe oyana kaakwiilongo



Elanditho lyuunona otali indjipala momudhingoloko gwOpuwo osho wo moRuacana sho aavali oyendji taya landitha po aanoona yawo yaakiintu opo ya vule okuhupa, osho aapanguli mompangu yaMangestrata yOutapi ya fatulula ngaaka oshiwike sha za ko. Aavali yamwe yAahimba momudhingoloko gwOpuwo oya li ya landitha po oyanakadhona opo ya mone iiyemo, omupanguli omukuluntu ta ti omukwashigwana gwaSouth Africa, Kenneth Karner ngoka ta tamenekelwa oshipotha shika, okwa li a uvanekele aavali okufuta N$2 500 mokanona kehe.
Kerner okwa li a holoka lwotango mompangu yOutapi moshitopolwa shaMusati oshiwike sha za ko, sho mangestrata Eden Amutenya a li a undulile komeho oshipotha she kEtiyali ndika opo a ka ninge eindilo lyombooloha.

Karner, 66, okwa li e ya moNamibia okupitila mOrandjemund moshitopolwa sha//Karas momasiku 10 Maalitsa onga omupashiyoni, okwa li a tsikile okuya koKamanjab nokOpuwo moshitopolwa shaKunene moka a li anuwa a pewa uunona mbuka uyali uushona okuza kaavali yawo, nelalakano lyoku wu longitha iilonga yuuhwapindi.
Omupangulikuluntu mompangulilo yaMangestrata mOutapi okwa li a fatulula kutya omolwa onkalo yoluhepo, oyendji yomaavali ohaya hala okugandja po oyana. 

“Okwa futa N$2 500 mokakadhona kehe opo a vule okuendanenda nayo. Shoka twa mono osho shoka kutya omolwa eyambidhidho lya nkundipapala okuza kepangelo, onkalo yoluhepo nokwaa na iilonga, shika osha li she ya fala monkalo moka haya hupu maapashiyoni mboka haye ya futu okamaliwa okashona ya vule okuthanekwa nayo,” ta fatulula ngaaka.
Ta ti oshimaliwa shika sha futwa ohashi longithwa mokulanda iikulya. 

“Oshili osho shika kutya aantu mbaka ya mona iihuna moKunene nOmustai ngaashi Aahimba, Aadhemba, Aatjimba nAangambwe ihaya yi koosikola, nohaya hupu pamiklalo 
ndhika.”
 


Loide Jason
2020-04-27 09:26:12 4 months ago

Be the first to post a comment...