• September 27th, 2020
Login / Register

Onyata thalakwa….Aakalimo yomoNew Reception 3 mOngwediva ya mono omiinolo



ONGWEDIVA - Elelo lyondoolopa yaNgwediva olya gandja ompito kaakalimo yomomudhingoloko gwoNew Reception 03, okuninga omayindilo opo ya andjaganekelwe oopayipi dhoku enda onyata gokuza muundjugo wawo, okuya kelambo lyonyata, oshali shamuhongi okuza omasiku 03 gaAguste sigo 29 gaJanuali omumvo tagu ya.
Ndhoka odha popiwa kumayola gwondoolopa yaNgwediva Angelina Angula, Etine lya zi ko sho kwa li a patulula elambo ndyoka pambelewa.
“Elambo ndika otali ka gongela oonyata adhihe momudhingoloko gwoNew Receiption 3 mOngwediva. Oopayipi dhoku enda onyata odha pwa  okulongwa nale,” Angula  ta ti ngaaka.

Ta kumagidha aakalimo yomomudhingoloko ngoka ta ti, inaya etha ompito ndjika ya pewa oshali uule woomwedhi hamano okuninga omayindilo. Iilonga ya tya ngaaka ohayi futwa shito imaliwa ya pita N$2 000. Aakalimo naya thike pombelewa yelelo lyondoolopa, opo ya ninge omayindilo gawo.

Mayola okwa li a fatulula ta ti, shika okwa li ye shi ningi okuhumitha komeho ondoolopa yaNgwediva, oshowo okutula aakalimo yomoNgwediva monkalo  tayi hokitha, unene mboka yeli komalukanda. Omahala geli 113 momudhingoloko moka, otaga kaandjanekwa oopayi okuya kelambo  lyonyata. 
Elelo lyondoolopa okwali lyalongitha oomilliona dhapita pu mbali, okulonga iilonga ayihe mbyoka. “Elelo lyondoolopa natango olya shunitha pevi ihohela yokomwedhi, omolwa omukithi gwoCovid-19 ngoka gwa shunitha wo iiyemo yo yendji pevi omanga yamwe yakanitha iilonga ,” Angula a popi ngaaka.

Ta ti, uuwanawa mboka inawu talikako wa gandjwa oshali shamuhongi, oshoka natango oya tegelela oshigwana shifute iifutwa yawo yokomwedhi opo ya tsikile okulongela oshigwana uwanawa wa gwedhwapo. “Okugandja omawuwanawa gatya ngiika, oshasimana moshigwana. Ngaashi okutunga oopate dhili nawa, omeya oshowo oku andjaneka omalusheno,”Angula ta ti ngaaka.
Angula okwali atothomo kutya oshitopolwa shaNgwediva otashi humukomeho, aniwa sho ayelekanitha konima yazi, nopondondo mpoka oshitopolwa shili mongaashingeyi, opena eyooloko enene. Agwedhapo ta ti, omasiku ga ziko epandaanda tali ithanwa Ehenge Ongwediva, okwali lyalongwa nawa, etali andjanekwa oopaipi  dhoku enda oonyata okuya kominoolo ndoka onene.  Natango oya uvaneke okuningila Extention 15 omawanawa gafaathana. 

“Omahala agehe koExtension 4 oshowo ombinga yimwe yolukanda lwaSky,ogeli metifa oku kaandjanekwa olusheno kehangano lyoNored,” Mayola a popi ngaaka. Hugunina okwali a pandula ehangano lyoWater Engineering Afrika, ndyoka kwali lyapewa okontalaka okulonga iilonga mbyoka, sho lyalongo lyiitulamo etali mana iilonga mbyoka, omanga omasiku kwali ya pewa inaaga adha. 


Victoria Kaapanda
2020-08-10 11:57:32 1 months ago

Be the first to post a comment...