• December 11th, 2019
Login / Register

Oofamili dhi li mompumbwe dha pewa omagumbo



OMUTHIYA – Elelondoolopa lyaMuthiya okupitila mombelewa yaMayola oya tunga omalukalwa goofamili ndatu ndhoka dha dhengwa koluhepo noya li haya lala momagumbo ga dhikwa niipakete kolukanda lwaKaniita.

Nonando mboka ye li kokule ye wete shika sha fa omagumbo gaa na ongushu, oga simana koofamili ndhika, notaya ti oya kala nokumona iihuna konkalo yombepo, omayoka osho wo omaponokelo taye ga ningilwa kaakwashigwana.

“Mpaka opu li hwepo okuyelekanitha naampoka twa li hatu zi, kapwa li egameno lyasha oshoka ohatu lala ashike mehalandjandja twa isiikila iipakete. Olundji aayendanandjila ohaye tu umbu omalaka, nosha li oshidhigu uuna taku lokwa,” osho Abiatar Johannes, ngoka e na aanona yahamano a ti ngaaka.

Oha zi nomukulukadhi gwe, yo ayehe ihaya longo. Johannnes ta ti okwa kala monkalo ndjoka ondhigu uule konyala woomvula omugoyi, oomvula oonshona konima sho Omuthiya gwa li gwa ningwa ondoolopa. Nonando a pandula ngaaka, Johannes ota ti egumbo lyawo ndika epe olyi li popepi nokandjugo noha ka umbu ezimba elulu.

“Kandi shi kutya otatu ka gwana mo ngiini mondunda ndjika oshoka ondi na ofamili onene, unene tuu uunona. Mpoka twa zi onda li nda ninga po okandunda kamwe, ashike ngashiingeyi kandi shiwo. Oshilambo shokandjugo nasho uupyakadhi woo, otashi umbu ezimba tse otu na aanona aashona,” ta gwedha po ngaaka.

Johannes ke na iilonga yolela noha hupu sho ha kwathele mokulondeka oositoka mOmuthiya, omanga omukulukadhi gwe ha landitha okapana. Egumbo olya li lya gandjwa kominista yomayambulepo goondoolopa niitopolwa yokuushayi Peya Mushelenga, ngoka wo a li a ti ehala kali na ombepo ya yela nawa, ashike okwa li wo a pupula elelo kombunda molwoonkambadhala dhawo dhokukwathela mboka ye li mompumbwe.

Omukuluntuwiliki gwElelondoolopa lyoMuthiya Simon Nghuulondo okwa ti egumbo ndika olya li lye ya po okupitila mombelewa yaMayola, ndjoka yi na oshinakugwanithwa shopankalathano shokukwathela mboka ya hepa moshigwana.


Obrien Simasiku
2019-11-22 08:54:38 19 days ago

Be the first to post a comment...