• November 19th, 2019
Login / Register

Ookompiuta dhopeke dha yakwa pOsikola mOngwediva 


Victoria Kaapanda

ONGWEDIVA-Opolisi moshitopolwa shaShana oyi li molukongo lwaafuthi mboka ya ponokele osikola Hashiyana Primary nokuyaka mo ookompiuta dhopeke dhi li 36 komatango gEtiyali.

Omugandjimulombo nomugandji gomawuyelele gwopolisi moshitopolwa shaShana Inspekta Thomas Aiyambo okwa ti oshiningwanima shika osha li sha lopotwa potundi 05h48 yongulonene, esiku lya landula ko.
“Otaku hokololwa kutya omwoopaleki posikola mpoka oye a li a dhimbulula kutya osikola oya talelwa po koombudhi ongula yEtitatu sho a li a thiki tango posikola. Nokwa li e shi lopota mbala kugumwe gwomaalongi aakuluntu yaalongi,” Aiyambo ta ti ngaaka.

Ta hokolola ta ti aafuthi mboka oya li ya pitile mombelewa yomukuluntu sikola moka inaaya kutha mo nando osha, taya tsikile okuteya mombelewa yomukuluntu gwoshikondo (HOD), moka ya mono uupitilo okuya mongulu yookompiuta.

Aiyambo ta ti mongulu yookompiuta oya li ya kutha mo ookompiuta dhopeke dhi li 35 ooshona nayimwe onene opamwe notyatyela yawo. Oyali ya faalele natango Ethano lyokuthaneka lyoCanon, otyatyela nondjato yalyo oshowo okakalata komethano moka.

Ayihe mbyoka oya li ya yi naafuthi oyi na ongushu yooN$ 83 800. 
Opolisi mOshitopolwa shaShana otayi pula ekwatho moshigwana ngele ope na ngu e na uuyelele kombinga yiinima mbyoka ya yakwa posikola ndjoka, a ninge ekwatathano  nopolisi yopopepi naye.

Shika osha ningi oshikando oshitiyali omvula ndjika mOngwediva sho osikola yopawumwene Kleine Kuppe nayo ya li ya yakwa ookompiuta dhopeke dhi li 37 dhongushu N$ 259 000 omwedhi gwa yi, ihe sigo  onena inadhi monika.


Staff Reporter
2019-10-31 07:45:17 19 days ago

Be the first to post a comment...

You might also like...