• June 2nd, 2020
Login / Register

Oongeshefa adhihe mOngwediva otadhi ka pata po 18h00 okuza nena



Victoria Kaapanda

ONGWEDIVA-Elelo lyondoolopa lyaNgwediva olya ningi omatokolo kutya kehe ehala lyomanwino, nenge lyiikunwa nomayinyanyudho momudhingoloko gwaNgwediva nali kale lya pata okuza potundi ontihamano yokomatango.

Omupopiliko gwelelo lyondoolopa mOngwediva Jackson Muma okwa ti shika oye shi tokola sha landula elombwelo lyomuPresidente gwoshilongo Hage Geingob sho ta ti oshigwana nashi ikaleke kokule nomahala ga udha, okukelela omukithi gwoCovid-19.

“Omahala ngoka ogo unene haga udha aakwashigwana, nethimbo ndyoka lya tulwa po itali ka kondwa nando. Omahala agehe otaga ka pata potundi ontihamano yokomatango, okuza Omaandaha sigo Osoondaha,” Muma ta ti ngaaka.

Okwa li a fatulula ta ti shoka otashi ka tulwa miilonga okuza nena, (27 Maalitsa) sigo 16 gaApili nuumvo, ta ti aalandithi ayehe yomomapandaanda inaya konda owili ndjoka ya tulwa po mwa kwatelwa mboka yomomatala.

Muma okwa li a kumagidha omahala ngoka ga pewa sigo owili ndjoka yokupata opo ya kale taya lombwele ookasitoma dhawo kutya nadhi lande, dho tadhi shuna komagumbo gawo, inaya ngundumanene ehala.
Kehe ehala nali kale lyi na omeya gothewa gokwiiyoga koonyala, ge li puwayela opo ga longithwe kukehe ngoka te ya pehala mpoka.

Okwa gwedha po ta ti oombelewa dhawo itadhi ka tambula oshimaliwa koonyala, ngele gumwe ta futu omafendelo gaMuni, ihe naye shi ninge pawutekinika wongodhi.
Muma okwa li a koleke kutya kehe ngoka a li a patelwa omeya ge kumuni omolwa oondjo moshitopolwa shaNgwediva, oye ga patulula opo kehe gumwe a kale e na omeya popi naye oku kelela omukithi goCovid-19.

“Kehe shoka tashi kaholoka konima yoowili dhiilonga 15h00 na dhenge konomola 081 149 0075,” Muma  a popi ngaaka. 


Staff Reporter
2020-03-27 10:14:15 2 months ago

Be the first to post a comment...