• October 16th, 2019
Login / Register

Oonkondja dhoshipundi shuu-CEO waMuthiya dha kindji



Omuthiya –Onkodja yi na sha noshipundi shuuwiliki wElelo lyondoolopa Omuthiya ndhoka dha kala dha kwatela mo ngoka a li nale omunambelewa omukuluntu melelo ndyoka, Samuel Mbango otadhi ka uvika mompangu yaaniilonga mOndangwa.

Mbango okwa ithana elelo kompangu yaaniilonga omolwa etidho miilonga ndyoka ta ti kalya li paveta, sho okontalaka ye ndjoka a li e na ya kushu mesiku 31 Aguste. Ta ti elelo inali landula omilandu sho lye mu kutha miilonga oshoka okwa li a lombelwa mokathimbo okafupi nonando oveta tayi ti omuntu oku na okulombwela shi na sha nekuthomo miilonga omanga ku na oomwedhi ndatu. 

Okwa ulike omunwe ookansela yelelo, ya kwatela mo Mayola Katrina Uusiku, nomupeha gwe Hiskiel Nanyeni, omunashipundi gwokangundumutima kelelo Beata Nashongo noshilyo shokangudumutima Enos Shipahu, ta ti oyo ye mu tuntu mo mombelewa sho e ya nyana molwa iilonga yawo yokulunga itapula. 

Mombapila ya nyolelwa Mbango momasiku 10 Juni, omwa nyolwa kutya “Shi ikolelela ketokolo lya ningwa mesiku Juni 3, 2019, oshikundathanwa MC31/05/2019 otashi holola kutya kontalaka yoye oya li ya kundatwanwa nokwa tokolwa kutya opoosa ndjoka u na yuu-CEO ot yi ka nyanyangidhwa, na ou na uuthemba okuninga eindilo.” 

Pakukala po, onkatu ndjoka ya kutha oyi li nale kondje yokontalaka yiilonga ye, ndjoka tayi pula opo andola elelo lyi gandje oomwedhi ndatu omanga inaa li kutha omunkuluntuwiliki miilonga.  Sho a tseyithilwa ekutho lye miilonga Mbango okwa tindi okuya pohi inaa popya, onkene okwa popi ombahu nokawawa ta ti aahona ye oye na uukwamuhoko, yo ohaya dhengele ondhi peho, ashike ookansela mbaka oya nukile pomutenya noku dhi itukumuna.  

Sho iinima ya lulu, ookansela oya kambadhala andola okunanena omunista yomayambulepo goondoolopa niitopolwa yokuushayi, Peya Mushelanga, ashike minista okiikanyuna, ta ti oshinima shoka paife oshi li momake goveta, nashi potokononwe kaaleli yondoolopa yoyene. Momushangwa gwa nyolwa muSepetemba, 12, mokuyamukula ookasensela mboka ya li taya kongo epopilo mesiku Aguste 15, Mushelenga okwa ti: “shi ikolelela kOShitopolwa  27 (3) (b) (I) shOntotwaveta yomalelo goondoolopa onti-23 yomomumvo1992 ngaashi ka talululwa, okansela oyi na okusa oshimpwiyu okulombela omunambelewa omukuluntu kutya oya tamununa okontalaka ye nenge hasho. Inandi pewa nando uumbangi mbuka wa pumbiwa paveta.”  

Mushelenga okwa gwedha ko ishewe ta ti: “ngele iinima mbyoka ya popiwa mokatendo 1.1 sigo oko-1.4 momushangwa gweni oyi li mondjila, nena okwa li mu na okuningila CEO oshipotha ngele okansela oyi na uumbangi moshinima shika.  Onkene Minista a pula ookansela ya se oshimpwiyu kutya oya landula omilandu opo ya iyageke oonkondja dhopaveta nomashongo goludhi ndoka.  Ashike ombapila yaMushelanga oye ya kwa laata, notashi vulika kaayi ka dhime omulilo ngoka gwa yaka nale. Okuza oshiwike sha zi ko, okansela oya ulike Simon Nghuulondo oye a kale omukuluntuwiliki gwondoolopa pakathimbo.


Obrien Simasiku
2019-09-27 10:02:52 18 days ago

Be the first to post a comment...