• August 25th, 2019
Login / Register

Oonkundana dhomaudhano paufupi



Oshakati - Osipana yopashigwana yokatanga kokoompadhi:
Ehuliloshiwike oosipana dhokatanga kokoompadhi ta dhi kutha ombinga mekopi lyiigwana yaAfrica nuumvo odha li dha kwashilipalekwa nkene tadhi ka dhana konima sho odraw ya li ya ningwa moCairo shaEgypt.

Namibia okwa li a tulwa mokatungwa kiilongo ya-D moka mu na omambalangandja gaAfrica ngaaashi, Cote d’Ivore,Morocco, naSouth Africa muyimwe yomoongundu dha talika onge oongundu oonankondo kaaku na we naNamibia oye e li mo a fa okalongo okashona pambaapila.

Namibia oku na okutula ombunda moshihwa ngele oku na ohokwe yokuwayuka mo mongundu ndjika, tashi ti okwa pumbwa okudhenga gamwe gomomambalangandja ngaka opo a wape okuhuma komeho, nongele hasho nena Namibia ota ka ninga ngaashi ha ningi shito mekopi ndika oku ya a ka uhale nokugalukila kegumbo kuyele.

Mondjokonona yekopi ndika Namibia kapu na nando esiku a zile mo mongundu nokuya kedhingoloko lya landula ko.
Uudhano mbuka owa tegelelwa wu ka ye mondambo sho tali ka kala eti-21 lyaJuni 2019 sho Egypt ta ki italela naZimbabwe, omanga Namibia ota ka patulula uudhano wongundu ya-D naMorocco mo23 gaJuni.

First Division:
Oosipana ndhoka hadhi dhana mooliha mbali moshilongo oonshona onkene natango dhi li komukala tadhi pona omate oshoka ooliha ndhika sigo onena inadhi tameka, na kape na wo omandhindhiliko kutya otadhi ka tameka uunake.
Oliha yoFirst Division noSecond Division adhihe nkene dha tulile mo ombiliki konyala omumvo gwa yi sigo okeluwa ndika inadhi thanga nando etanga.

Shika osha tula oyendji yomaaholi yomawudhano momalimbililo oshoka ooliha ndhika odho ekota lyomawudhano moshilongo.

The Namibian Newspaper Cup: 
Ekopi lyoshifonkundana shoThe Namibian ndyoka hali dhanwa aluhe pethimbo lyiituthi yaPaasa oko li li nonuumvo nota li ka dhanenwa koshitopolwa shaHardap kondoolopa yaMariental.
Iitopolwa ayihe moshilongo oko tayi ka yunga oontanda hoka okutala kutya olye ta ka toola po oshihani shekopi ndika hali dhanwa kaadhani ye li kohi yomimvo 20.

Omaheke otaga ka ya muudhano mbuka onge enyakwa konima sho ga li ga sindana po uudhano mbuka omvula ya za ko sho uudhano mbuka wa li wa dhanenwa koZambezi, omanga Kavango East oye a li enyakwa lyuudhano wokatanga komokambambamba.
Oondjila adhihe okoMariental ehuliloshiwike ndika.


Shipi Elago
2019-04-18 10:59:56 4 months ago

Be the first to post a comment...