• July 20th, 2019
Login / Register

Oonkundana dhomawudhano moshilongo



Oshakati - Omaudhano ga yooloka otaga ka kutha oyendji moomvugo.

Man of Action Annual Sports Tournament 2019:
Uudhano waakokele naamboka ya tsilika omakwa mboka hawu kala ko aluhe pethimbo lyiituthi yaPaasa mOkahao nonuumvo oko wu li, okuzilila pokapale kosekundosikola yaShaanika Nashilongo.

Uudhano mbuka owu li wa lukilwa Eddy Willbard, ngoka a li a dhana onkandangala ngele otashi ya mokupendula po omawudhano moshitunda Onekuni, nokwa li wo e na okalaba ndjoka ya li ya putudha nokutsika iiyimati oyindji mOkahao ano California Football Club.

Kakele kokatanga kokoompadhi Eddy oku li woo oye gwotango mondjokonona yOkahao oku eta ethigathano lyuuthanguthangu moshitopolwa shoka ndyoka wo lya li lya landulwa kethigathano ndyoka pamwe inali ningwa mo nando onale moshitunda Namibia, ethigathano lyoogwamululu.

Okahao hoka ke li enyakwa lyuudhano mbuka oomvula mbali dha lambathana ota ka kaya muudhano mbuka ke na eho limwe kekopi oshoka oka hala okuninga ondjokonona yokusindana ekopi ndika iikando itatu ya lambathana.
Ekwalyamushemo ndyoka aluhe hali ya muudhano mbuka lyi na aadhani ye na omadhina, nopambaapila ohali monika olyo osipana ontilithi, olyi na okufumbika onkalo yuuSimoni yamalombo ngele oya hala okusindana po ekopi ndika nuumvo.

Oluteyi ndoka lwa li lwa tilitha oosipana odhindji omvula ya za ko sho lwa li lwa dhana okatanga kokombanda yomafuta nalo otalu ya lwa tala kekopi nonando olwa taalela omashongo okuzilila koosipana ngaashi Uukwalumbe, Onemanya nOmuthitu ndhoka nadho dhi li dha kenya komayego nodha sa ondjala okuyakula po ekopi ndika nuumvo.
Uudhano mbuka ohawu dhanwa pamikunda, na kehe omukunda tagu kutha ombinga nogwa pumbwa okutula poshitaafula okapandi koN$ 2500 komayishangitho.

Uudhano mbuka otau ka patululwa pambelewa komupeviminista gwemona  Natangwe Iithete notawu kala ko okuza mo19 sigo 21 Apilili 2019.

Ruacana annual Easter Tournament:
Aanamibia koombinga noombinga ngaashi sha kala omukalondjigilile otaya ka mbombolokela koRuacana okukutha ombinga muudhano mboka hawu unganekwa kelelondoolopa pethimbo lyaPaasa.

Uudhano mbuka nonuumvo oko wu li nangaashi shi li omuthigululwakalo gwuudhano mbuka uudhano owa topolwa miitopolwa ya yooloka ngaashi okatanga kokoomapdhi koontana dhanelende ndhoka tadhi ki ishangitha nokapandi kooN$ 500, okatanga kokoompadhi kaamati aanyanyamagulu N$1180, okatanga kokoompadhi kaakokele N$500, okatanga komokambamba (Netball) N$510, Basketball N$510,Volleyball N$510, Okumbwinda N$100.
Uudhano mbuka otawu ka tameka momasiku 19 kate 22 omwedhi nguka moRuacana.

Brave Gladiator:
Osipana yopashigwana yokatanga kokoompadhi yaakadhona Brave Gladiators Etiyali lya zi ko oya li ya gu mo muudhadhano wokuyaleka ehala muudhano wOlympics konima sho ya li ya dhana okalimba komakutsi nokudhana shi thike pamwe naBotswana 2-2, ashike Botswana okwa li a dhenge uukadhona waNamibia koBotswana nokoola 1-0 onkene iizemo mbika oya li ya tulwa kumwe, Botswana okwa li e na okuhuma komeho methigathano ndika oshoka oku na ookoola 3-2.

Ookola dhaNamibia odha li dha tulwa mo ku Lovisa Mulunga naZenatha Coleman, nuudhano owa li wa dhanwa ongulohi yEtine lya za ko moshilandopangelo okuzilila pokapale kaSam Nujoma.


Shipi Elago
2019-04-12 12:36:39 3 months ago

Be the first to post a comment...

You might also like...