• May 24th, 2019
Login / Register

Oonkundana dhomawudhano pawufupi


Kefas Shipi Elago

Oshakati - Okalindeli kuudhano wokatanga kokoompadhi koosipana dhopashigwana:
Ehuliloshiwike ndika uudhano awuhe wookalaba otawu ka tula mo ombiliki noku pa uudhano woosipana dhopashigwana olufo, mboka owo tau ka kala tau dhana onkandangala ehuliloshiwike alihe.
Osipana yopashigwana yaandjetu oyi li yi idhenga olweendo ya thinda koLusaka shaZambia hoka tayi ka kutha ombinga muudhano wawo wahugunina wongundu yiilongo ya-K. Namibia okwa pumbwa ashike oshitsa shimwe, nangele okwe shi likola nena ota ka ya momusholondondo gwiilongo mbyoka tayi ka kutha ombinga muudhano wekopi lyiigwana yaAfrica ndyoka tali ka dhanwa muJuni nuumvo kevi lyaantu yaPharao.
Ashike Namibia ota vulu wo okuya kuEgypt nando okwa pewa nambwa kuZambia, ashike shika otashi ka ningwa owala ngele Guinea Bissau okwa dhenge Mozambique, nenge ya dhana shi thike pamwe.
Ashike ngele Namibia okwa tege uudhila ta kotha ndele ta etha a dhengwe kuZambia ndele Mozambique ta dhenge Guinea nena Namibia naZambia otaya ka enda mokawato kamwe komahodhi.
Uudhano wiilongo yongundu ya-K otau tameke po18:30 moka uudhano wa Namibia naZambia tau dhanenwa mokapale koHeroes National Stadium, omanga uudhano waGuinea na Mozambique otau dhanenwa mokapale koEstadio 24 de Setembro ke li moGuinea, epandja lyomaudhano lyaKundana otali halele osipana yetu yopashigwana ompolo.
Coca Cola Championship:
Ehuliloshiwike lya z ako ontsi oya li ya tsima momeya pokapale kemanguluko mOshakati sho iipandi yomanyakwa omanene muudhano woateletika moNamibia ga li ga yungu oontanda muudhano waCoca Cola Championship wolweetho lwahugunina.
Humavinda Mbandja gwoKalaba yaUnam oye a li a sindana po oshinano shoometa 100 shoontana dhanelende lyuugwanga moka a li e shi mana muule woosekonde 12.58, Herunga Tjipekapora oye a sindana po oshinano shoometa 200 nethimbo lyo24.72.
Oshinano shoometa 400 shoomeme osha li sha yakulwa po kuShekupe Gustaf, ngoka wo a li a yakula po oshinano shoometa 800.
Shivolo Martha oye a li a sindana po oshinano shoometa 1500 shoomeme moka omanga Matana Kalinasho oye a li a sindana po oshinano shoometa 1000.
Tjiramba Ismael oye a sindana po oshinano shomakanda shoometa 100, omanga Tities Keneth a li a sindana po oshinano shoometa 200.
Kauanivi Mynhardt oye enyakwa lyoshinano shoometa 1000, omanga Shaliaxwe Jeremia oye a toola po ehala lyotango muudhano woshinano shoometa 1500 shomakanda.
Nghipandulwa David oye enyakwa lyoshinano shoometa 800 shaamati.
Uudhano mbuka ohau dhanwa muule womadhingoloko gatatu moka edhingoloko lyotango lya li komunkulofuta, Etiyali okOtjiwarongo nolweetho lwahugunina olwa li lwa dhanenwa mOshakati ehuliloshiwike lya za ko.
Ekopi lyoshifo sho The Namibian:
Oshitopolwa shaHangwena oshi li sha kwata ondjuhwa komulungu okutotha mo uumatyona wu li kohi yomimvo 20 mboka tau ka kalela po oshitopolwa muudhano wokomumvo woshifokundaneki sho TheNamibian mboka aluhe hau kala ko pethimbo lyopaasa.
Omadhewo oge li metifa pokapale kaPonhofi ngoka ga li ga tameke nokuli ohela, mboka taya kutha ombinga naya kale ya valwa mo 2000, okuya pevi.


Staff Reporter
2019-03-22 11:26:11 2 months ago

Be the first to post a comment...