• October 31st, 2020
Login / Register

Opolisi ya halakanitha oosa dhomutoolinkundana


Opolisi mOshitopolwa shaShana oya halakanitha oshituthihupulitho shomutoolinkunda gwokoshikondo sho kutuma omawi mombepo shoKati FM mEtitano.

Rebbeca Elifas Kanunu  okwa hulitha oshiwike sha zi ko, nokwa fumbikwa mOlomakaya. Oshituthihupulitho shoka shali sha gongalwa kaantu yathika 30, nonando oyali ya landula  omalandulathano goCovid-19, ngaashi okupititha po omahala pokati komuntu nomuntu, oshowo oku iyoga koonyala, oyali ya tidhwa mo megumbo  omanga inaa ya mana nelandulathano lyoshituthi.
Gumwe gwomaakwanezimo okwa ti opolisi okwali ya tidha mo aalilisa  omanga ehupulutho inaa li pwa, nompito yokuumba ongalo ina yi thika.
“Tse aakwanezimo otu uvite nayi oshoka otwa li twa ningi omalongekidho, twa longekidhila aalilisa oikulya, ihe iinima yetu oya hepa owala oshoka kape na ngo teyi li” omukwanezimo ta ti ngaka.

Ta gwedha po ta ti, nonande aayenda yoshituthi ya tidhwa ngaaka, ofamili oyo shi uvite ko lela kutya shoka tashi kondjithwa okukeelela etaandelo lyomukithi moshigwana, ihe ngele  tashi ya koosa okwa pumbwa pu ningwe omalunduluko ga gwedha po.
Omukwanezimo ta ti, KAPE na oosa tadhi lilwa kaantu yeli 10, oshoka momagumbo gamwe omu na nale  aantu ya pita pomulongo. “Yamwe otaya falwa peni? olye ta yambidhidha moosa  ngele aakwanezimo  nookume oyo haya kugu onkugo?“
“Ngele osho tashi kala  ngaaka, epangelo  nali kale tali yambidhidha moosa oshoka mboka ye na okuyambidhidha  otaya fukwa mo,” a popi ngaaka.

Omukwanezimo tapopi neyeme ta ti oosa nadhisimanekwe oshoka aantu oyeli moluhodhi, shoka sha pimbiwa okulandulwa  ashike oompango.
Elifas okwa mono  egumbo  lye lyaaluhe  Olyomakaya  ga, momayendo  gaElim moshitopolwa shaMusati. Ashike hoka natango  kwali  etanga lyopolisi tali tula po omalandulathano nokukwalishipaleka  kutya aantu  ashike yeli  omulongo yeli pomayendo.
Gumwe goomapolisi  okwali  a lombwele Kundana kutya  yo inaya  endela  uuwinayi, ihe otaya  tula po  ashike omalandulathano ngoka ge na okulandulwa okukeelela  omukithi ngoka.

Kanunu okwa hulitha momasiku  06 Aguste nuumvo moshipangelo shaKatutura  mOvenduka moka  a ningi owala owili yimwe, ho a tumwa okuza koshipangelo shopaumwene Lady Pohamba.
Otaku hokololwa kutya  okwali a ya moshipangelo  noka moka tandwa iikando iyali  kiipangelo ya yooloka. Okwali a iyuvu  ta ehama mepundo nokuya koshipangelo hoka aka tandwa. Okwa ningi  oomwedhi mbali nomasiku moshipangelo.
Okwa thigiko yina, okamwanamati komimvo ndatu oshowo omumwayinakadhona


Victoria Kaapanda
2020-08-17 11:39:20 2 months ago

Be the first to post a comment...