• November 16th, 2019
Login / Register

Oshakati oyo dhingi mokugandja omagumbo



Victoria Kaapanda

ONDWEDIVA –Elelo lyoNdoolopa yaShakati olya tothwa mo olyo lyotango momalelo goondolopa agehe moNamibia ngele tashi ya kokugandja evi nokutunga omagumbo gaakalimo.

Ndhika odha etwa puuyelele kuMininsta gwehumokomeho lyiilando niitopolwa yokuushayi Peya Mushelenga, poshiindingili mpoka Omupresidente Hage Geingob a li ta gandja omagumbo kooyene mEhenye mOshakati.

Mushelenga okwa ti Elelo lyoNdoolopa yaShakati olya kala lyi li komeho miilonga yalyo nolyo ishewe lyi li ponomola yotango mopolohalama yoMassive Urban Land Servicing Project (MULSP) ndjoka tayi lalakanene okukandula po omukundu gwokwaa na omagumbo moshilongo.  

Mushelenga ta tumbaleke Oshakati, ta ti oya opaleka nokulongekidha omahala ge li 4245 okuza mo2014 sigo 2017. Methimbo ndjoka efupi omo mwa longwa iilonga ya kwatela mo elongekidho lyoopolota komahala ngaashi koExtention 16, ndjoka ya tseyika nedhina Okaku Kiipupu hoka kwa longekidhwa oopolota dhi li 273, kEkuku 2272 oshowo kEhenye oopolota 1800. Ongedji gomomagumbo ngoka oge na nale ooyene.

“Oshakati oyo ondoolopa ya longa yi vule oondoolopa adhihe moNamibia, onde yi pandula oshoka otayi gandja oshiholelwa oshiwanawa komalelo omakwawo ngoka ge na ohokwe nehalo okuyambula po nokuhumitha komeho oondoolopa dhawo, Oshakati natango oya gandja ethaneko okulongekidha omahala ogendji gaakwashigwana yago,” Mushelenga ta ti ngaaka.

Elelolo olya gwedha ko ishewe kevi ndyoka li na, nolyi ipyakidhila okulongekidha evi ndyoka li li komahala ga kwatela mo Okaku Kiipupu, oshitopolwa shotango, oshitiyali oshowo noshititatu. Otaku longekidhwa wo omahala gomangeshefelo omanene kOthingo hoka taku ka kala omahala gethike po350 oshowo kOnawa hoka kwa longekidhilwa ge li 3000.

Elelo lyondoolopa yaShakati natango olyi li metifa okulongekidha omahala kOmpumbu ge li 1647 oshowo kombinga yimwe yEhenye ge li 492.

Geingob sho a li a patulula omagumbo ge li 1 300, kohi yoprograma tayi ithanwa MULSP, okwa ti elalakano lyokutungila aakwashigwana omagumbo kali shi ashike eyambulepo nehumokomeho lyoshilongo, ihe olyo ku uvitha wo nawa nokukaleka po uundjolowele gwaakwashigwana. 

Oprograma ndjoka oya li ya totwa po muJuni 2015, nelalakano okukandula po omikundu dhaamboka kaaye na omagumbo. Oya li ya tulwa miilonga konima sho Geingob oshowo Sophia Shaningwa ngoka pethimbo ndjoka oye a li ominista yehumokomeho lyoondoolopa niitopolwa yokuushayi ya talele po omahala ogendji noya li ya tokola okutameka noondoolopa dhi li mompumbwe unene ngaashi Windhoek, Walvis Bay oshowo Oshakati.

“Elelo lyoNdoolopa yaShakati olya longa oshilonga oshinene noshiwanawa, otandi pandula aakomeho ayehe yondoolopa sho ya li ya longele kumwe, okukandula po ompumbwe onene nelunduluko moonkalamwenyo dhoyendji taya ka mona omagumbo nena,” Geingob ta ti ngaaka.

Ta indile natango ooyene yomikunda moshilongo ya kwathele omalelo goondoolopa okugandja omahala mpoka tapu vulu okutungwa omagumbo natango.


Staff Reporter
2019-09-19 07:48:11 1 months ago

Be the first to post a comment...

You might also like...