• November 19th, 2019
Login / Register

Oshipotha shedhipago sha undulilwa komeho



Victoria Kaapanda

ONGWEDIVA-Omulumentu gwomimvo 31 ngoka ta tamanekelwa oshipotha shedhipago lyakuume ke komiihole molukanda Okandjengedi mOshakati omwedhi gwa yi, oshipotha she osha undulilwa komvula tayi ya.

Shika osha ningwa ohela mompangulilo yaMangestalata mOshakati.
Edward Haiyambo, okwa li a holoka shi na sha noshipotha shika lwoshikando oshitiyali komeho gaMangestrata Toini Shilongo ngoka e mu pe ompito yokukonga hahende gwepangelo. Shilongo okwa lombwele Haiyambo kutya ngele ota ka longitha hahende gwepangelo okwa pumbwa okufuta oshimaliwa shoN$350 kepangelo.

Haiyambo ngoka ta tamanekelwa edhipago lya kwatelwa kumwe nomahepekathano gomomagumbo, natango ka li a pulwa a tye ko sha kwaashoka ta tamanekelwa, oshoka omakonakono gopolisi inaga pwa noge li metifa.  Omutamaneki goshipotha Mpule Siyomonji okwa ti Haiyambo oku na nale iipotha oyindji mwa kwatelwa shoka sha li she mu tulitha mondholongo, moka a li a iyaka omanga ina ka dhipaga yina yaanona ye. Molwa oshipotha shika shedhipago, Haiyambo okwa li a tindilwa ombooloha, noshipotha she osha li sha undulilwa komasiku 20 Januali 2020.

Haiyambo otaku hokololwa anuwa a dhipaga Rusilia Isabella Quimbra, 31, a zile molukanda Evululuko mOshakati pehala tali ithanwa Ville Waters Village.

Konima sho a longo iilonga mbika yi nyanyaleka omulumentu nguka anuwa okwa yi e ta ka holama komukanda Olyavahenge moshitopolwa shaMusati, hoka a ka kwatelwa kopolisi.

Otaku hokololwa nakusa Quimbra a li e na aanona yane, mwa kwatelwa ye li yaali e ya vala nomufekelwa.
Nonando kapu na naanaa uuyelele wa yela, otaku hokololwa oontamanana dha holoka konima ookume mboka ya li ya zi kookamba. Mboka ye ya mono koondingosho oya ti Quimbra naHaiyambo yali ta ya monika ye na ngeno ombili, ashike esiku ndyoka olya ka hulila medhipago lyaQuimbra. 

Otaku fekelwa kutya Haiyambo okwa dhenge Quimbra noshinima inaashi tongololwa natango, e ta tsikile noku mu monitha oshiponga komutse nemenya oshowo molutu. Okwa adhika wo e mu teya okwaako.


Staff Reporter
2019-10-30 08:12:18 20 days ago

Be the first to post a comment...

You might also like...