• December 18th, 2018
Login / Register

Oshipuna OshiRussia tashi patulula ohotela ya nuka po moNamibia



WINDHOEK - Onkundana ya ziilila poNew York otayi kundaneke kutya omulumentu omuRussia, Rashid Sardov, ngoka e na iimaliwa kamana, ano e na oobiliona okwa ya meuvathano nehangano ndyoka tali nana oohotela dhoHabitas opo e ete mo moNamibia ohotela ndjika.  Opolojeka ndjika tayi ka kotha oomiliona otayi ka tungwa pehala lyaComsar Properties ndyoka lyomulumentu nguka. Omushangwa gwa pitithwa koombonge oonene dhoHabitas moNew York, USA, ogu ulika kutya ongundu ndjika, ya totwa mo2014 otayi ka patulula oohotela dhawo oompe, Habitas Namibia, konyala owili yimwe okuza kokapale kopashigwana koondhila koHosea Kutako.

Momushangwa, Omukuluntuwiliki gwoHabitas, Oliver Ripley okwa ti oya thaneka opolojeka ndjika tayi ka kala ya pwa mo2019. Ripley okwa ti ndjika otayi ka kala ya dhenga mbanda. Ripley ta koleke kutya Habitas oya adha euvathaniotsokumwe naComsar opo a lundululile ehala lye moshikunino shiinamwenyo, okutunga po ohotela yi na oondunda 40, ehala lyuundjolowele lyoshinanena, endiki lyelongo, nehala lyiigongi niituthi.

Etamununolunduluko ndika olye ya konima ashike yiiwike sho Uuministeli Wetalululo lyevi wa li wu li moshipyu shomalaka okuza kaakwashigwana konima sho she ya koontundulu kutya oshipuna shika shaRussia, okupitila mokampani yasho yoComsar Properties SA, ya li ya mono ehala enenene ya dhike po ehala lyi na iinamwenyo.

Omwedhi gwa yi, epangelo olya li lya popile etokolo lyalyo lyokugandja evi koComsar, tali ti shika osha pumbiwa omolwa uuwanawa mboka Namibia ta ka olikola ngele tashi ya keliko. Tali ti, taku gwedhwa kobiliona N$1 ndjoka ya tulwa nale moMarula game reserve, otashi gandja oompito dhomangeshefelo meukililo muupashiyoni, egameno lyuushitwe, osho wo oongeshefa dhilwe.

Oshikwawo osho shika kutya oshikondo shuupashiyoni otashi ka tyapula uuwanawa oshoka otapu ka kala pe na omwaalu gwaaRusia aapashiyoni oyendji moNamibia, naapashiyoni mboka otaya ka tula mo oshimaliwa oshindji moshilongo, taya gwedha ko koompale, osho wo ndhoka tadhi ka futwa epangelo koComsar. Ripley okwa ti ohotela otayi ka tungwa taku longithwa uutekenika wanakanena osho wo oonzo ndhoka hadhi vulu okupingenwa po.

“Otwa nyanyukwa noonkondo okukala twa hogololola Namibia onga egumbo lyetu lyotango moAfrica. Otwa pendula Comsar molweyambidhidho lye okulundululila ehala lyopandjokonona onga limwe lyomomahala dhingi gokugamena iinamwenyo,” Ripley ta popi ngaaka. Ta popi kutya Habitas otayi ka nana aapashiyoni oyendji muuyuni ye ye koNamibia tayi ka kwatela komeho ondjila onga oyo ontsapo yuupashiyoni woshili.

Habitas, ndjoka ya totwa po 2014, oya tseyika nawa omolwa onkalo yawo nontseyo ndjoka yoku eta aantu pamwe pamithigululwakalo, mwa kwatelwa onkalonawa, iikulya noondjimbo. Habitas oyi na oohotela MoTalum, ookalaba moNew York noLos Angeles, osho wo oopoloyeka tadhi ya moBali, Malibu, Namibia osho wo moBahamas.


Albertina Nakale
2018-11-30 11:34:12 18 days ago

Be the first to post a comment...

You might also like...